(١٥٢٦٦) عطاء بن یسار حضرت عمر بن حکم سے نقل فرماتے ہیں کہ میں رسول اللہ (صلی اللہ علیہ وآلہ وسلم) کے پاس آیا، میں نے کہا : اے اللہ کے رسول (صلی اللہ علیہ وآلہ وسلم) ! میری لونڈی میری بکریاں چرایا کرتی تھی۔ میں اس کے پاس آیا تو اس نے میری ایک بکری گم کردی تھی۔ میں نے اس سے بکری کے بارے میں پوچھا تو اس نے کہا : بھیڑیا کھا گیا ہے۔ مجھے اس پر غصہ آیا اور میں نے کہا : بھی بنو آدم میں سے ہوں، میں نے اس کے چہرے پر تھپڑ رسید کردیا اور میرے ذمہ ایک غلام آزاد کرنا ہے۔ کیا میں اس کو آزاد کر دوں۔ آپ (صلی اللہ علیہ وآلہ وسلم) نے اس لونڈی سے پوچھا : اللہ کہاں ہے ؟ اس نے کہا : آسمان میں۔ آپ (صلی اللہ علیہ وآلہ وسلم) نے پوچھا : میں کون ہوں ؟ اس نے کہا : آپ اللہ کے رسول ہیں تو آپ (صلی اللہ علیہ وآلہ وسلم) نے فرمایا : اس کو آزاد کر دے۔ عمر بن حکم نے کہا : اے اللہ کے رسول (صلی اللہ علیہ وآلہ وسلم) ! بہت سارے کام ہم جاہلیت میں کیا کرتے تھے ہم کاہنوں کے پاس آتے تھے، نبی (صلی اللہ علیہ وآلہ وسلم) نے فرمایا : تم کاہن کے پاس نہ جایا کرو، عمر نے کہا : ہم اچھا شگون لیتے تھے، آپ (صلی اللہ علیہ وآلہ وسلم) نے فرمایا : یہ تمہارے دل کے پیدا ہونے والی بات ہے جو تمہیں نقصان نہ دے گی۔