(١٥٢٧٤) یوسف بن عبداللہ بن سلام فرماتے ہیں کہ مجھے خویلہ بنت ثعلبہ جو اوس بن صامت کے نکاح میں تھی جو عبادہ بن صامت کے بھائی تھے، نے بیان کیا کہ اوس گھر آئے تو کچھ بات چیت ہوئی، جس کی وجہ سے وہ کبیدہ خاطر ہوئے۔ میں نے بھی جواب دیا تو اس نے غصہ میں کہہ دیا : تو میرے لیے میری ماں کی مانند ہے۔ پھر اپنی قوم کی مجلس میں گئے، جب واپس پلٹ کر آئے تو اس نے مجھے اپنے نفس کی طرف مائل کرنے کی کوشش کی تو میں نے انکار کردیا، اس نے میرے اوپر سختی کی تو میں نے بھی سخت مقابلہ کیا، میں جھگڑا میں اس پر غالب آئی، جیسے عورتیں کمزور آدمی پر غلبہ پا لیتی ہیں، فرماتی ہیں کہ میں نے کہا : اللہ کی قسم ! خویلہ کا نفس اس کے قابو میں ہے تو میرے قریب نہیں آسکتا جب تک میرے اور تیرے بارے میں رسول اللہ (صلی اللہ علیہ وآلہ وسلم) فیصلہ نہ فرما دیں، میں نے آکر رسول اللہ (صلی اللہ علیہ وآلہ وسلم) کو شکایت کی، آپ (صلی اللہ علیہ وآلہ وسلم) نے فرمایا : تیرا خاوند تیرے چچا کا بیٹا ہے، اللہ سے ڈر اور اس سے اچھا سلوک کر۔ کہتی ہیں : میں گئی نہ تھی کہ اللہ نے یہ آیات نازل فرما دیں : { قَدْ سَمِعَ اللّٰہُ قَوْلَ الَّتِیْ تُجَادِلُکَ فِیْ زَوْجِہَا } (المجادلہ : ١) آپ (صلی اللہ علیہ وآلہ وسلم) نے فرمایا : اس کو کہو کہ گردن آزاد کرے، خولہ کہنے لگی : اللہ کی قسم ! وہ کسی گردن کا مالک ہی نہیں ہے۔ آپ (صلی اللہ علیہ وآلہ وسلم) نے فرمایا : وہ دو ماہ کے مسلسل روزے رکھے۔ میں نے کہا : اے اللہ کے رسول (صلی اللہ علیہ وآلہ وسلم) ! وہ بوڑھا آدمی ہے، روزوں کی طاقت کہا ں۔ آپ (صلی اللہ علیہ وآلہ وسلم) نے فرمایا : ساٹھ مسکینوں کو کھانا کھلا دے۔ میں نے کہا : اے اللہ کے نبی (صلی اللہ علیہ وآلہ وسلم) ! اس کے پاس کھلانے کے لیے کچھ بھی نہیں ہے، آپ (صلی اللہ علیہ وآلہ وسلم) نے فرمایا : ہم اس کی ایک ٹوکرہ سے مدد کردیتے ہیں۔
عرق : اس ٹوکرہ کو کہتے ہیں جس میں ٣٠ ساع کھجور ہو۔ کہتی ہیں : میں نے کہا : اے اللہ کے رسول (صلی اللہ علیہ وآلہ وسلم) ! ایک ٹوکرہ میں بھی اس کی مدد کردوں گی، آپ (صلی اللہ علیہ وآلہ وسلم) نے فرمایا : تو نے اچھا کیا اس کو کہو کہ وہ صدقہ کرے۔