(١٥٣٤٥) علقمہ حضرت عبداللہ سے نقل فرماتے ہیں کہ ہم جمعہ کی رات مسجد میں تھے، ایک انصاری شخص آیا اور کہا : اگر کوئی شخص اپنی بیوی کے ساتھ کسی مرد کو پائے۔ اگر وہ بات کرے تو تم کوڑے لگاؤ گے اگر قتل کرے تم اس کو قتل کر دو گے، اگر خاموش رہے تو غصے والی بات پر خاموش رہے گا، اللہ کی قسم ! میں رسول اللہ (صلی اللہ علیہ وآلہ وسلم) سے ضرور سوال کروں گا، جب صبح ہوئی تو رسول اللہ (صلی اللہ علیہ وآلہ وسلم) سے آکر اس نے سوال کیا کہ کوئی شخص اپنی بیوی کے ساتھ کسی مرد کو پائے وہ ملامت کرے تم کوڑے لگاؤ گے اگر قتل کرے تو تم قتل کر دو گے۔ اگر خاموش رہے تو غصے والی بات پر خاموش رہے گا۔ اس نے کہا : اے اللہ ! تو اس معاملے کو حل فرما اور آپ (صلی اللہ علیہ وآلہ وسلم) دعا کر رہے تھے تو لعان والی آیات نازل ہوئی : { وَالَّذِیْنَ یَرْمُوْنَ اَزْوَاجَہُمْ وَلَمْ یَکُنْ لَہُمْ شُہَدَائُ اِلَّا اَنفُسُہُمْ } [النور ٦] ” وہ لوگ جو اپنی بیویوں پر تہمت لگاتے ہیں اور صرف خود ہی گواہ ہیں۔ “ یہی شخص اس میں مبتلا کردیا گیا تو میاں، بیوی نے آکر رسول اللہ (صلی اللہ علیہ وآلہ وسلم) کے پاس لعان کیا۔ مرد نے چار گواہیاں دیں کہ وہ سچا ہے اور پانچویں بار کی قسم میں اس نے کہا : اللہ کی لعنت ہو اگر وہ جھوٹا ہے، وہ عورت لعان کے لیے آئی تو رسول اللہ (صلی اللہ علیہ وآلہ وسلم) نے فرمایا : رک جا۔ اس نے لعان کرلیا، جب جانے لگی تو آپ (صلی اللہ علیہ وآلہ وسلم) نے فرمایا : شاید یہ سیاہ گھنگھریالے بالوں والا بچہ جنم دے تو اس نے سیاہ گھنگھریالے بالوں والا بچہ جنم دیا۔