(١٥٥١٤) عبداللہ بن عمر (رض) سے روایت ہے کہ طلاق شدہ عورت اور وہ عورت جس کا خاوند فوت ہوچکا ہو وہ دن میں نکلیں اور مکمل رات اپنے گھر کے علاوہ کسی دوسرے کے گھر میں نہ گزاریں۔
سفیان سے روایت ہے کہ مجھے موسیٰ بن عقبہ نے حدیث بیان کی وہ نافع سے روایت کرتے ہیں وہ عبداللہ بن عمر سے نقل فرماتے ہیں کہ طلاق بتۃ والی عورت دن کو زیارت کرے اور اپنے گھر کے علاوہ رات نہ گزارے۔
علقمہ سے روایت ہے کہ ہمدان قبیلے کی عورتوں کے لیے ان کے خاوندوں کی (وفات) کا اعلان کیا گیا، انھوں نے ابن مسعود سے سوال کیا کہ ہم وحشت محسوس کرتی ہیں۔ ان کو حکم دیا کہ وہ دن کو اکٹھی ہوجایا کریں اور جب رات ہو تو ہر ایک عورت اپنے گھر کی طرف پلٹ جائے۔
اسلم قبیلے کے ایک شخص سے روایت ہے کہ ایک عورت نے ام سلمہ (رض) سے سوال کیا اس کا خاوند فوت ہوگیا ہے کیا وہ اپنے والد کی بیمار پرسی کرسکتی ہے ؟ ام سلمہ نے کہا : تو رات کے دو حصوں میں سے ایک حصہ اپنے گھر میں گزار۔