(١٥٥٧٠) عبدالرحمن بن ابو لیلیٰ سے روایت ہے کہ انصار میں سے ایک آدمی اپنی قوم کے ساتھ عشاء کی نماز کے لیے نکلا اس کو جن نے قیدی بنا لیا۔ اسے گم پایا گیا، اس کی بیوی عمر بن خطاب (رض) کے پاس آئی اور اس کا قصہ بیان کیا عمر (رض) نے اس کی قوم سے سوال کیا تو انھوں نے کہا : جی ہاں ! وہ عشاء کی نماز کے لیے نکلاتو اس کو گم پایا گیا۔ عمر (رض) نے اس کو حکم دیا کہ وہ چار سال تک انتظار کرے۔ جب چار سال گزر گئے تو وہ عمر (رض) کے پاس آئی اور ان کو خبر دی اور عمر (رض) نے ان سے سوال کیا۔ انھوں نے کہا : جی ہاں ! اس کو عمر (رض) نے حکم دیا کہ وہ شادی کرلے ۔ اس نے شادی کرلی پھر اس کا خاوند آگیا۔ اس نے اس کے بارے میں عمر بن خطاب (رض) کی طرف جھگڑا پیش کیا۔ عمر بن خطاب (رض) نے فرمایا : تمہارا ایک لمبا عرصہ گم ہوجاتا ہے اس کے اہل نہیں جانتے کہ وہ زندہ ہے۔ اس نے عمر بن خطاب کو کہا : اے امیر المؤمنین ! میرے پاس عذر ہے۔ آپ نے کہا : تیرا کیا عذر ہے ؟ اس نے کہا : میں عشاء کی نماز کے لیے نکلا تو مجھے جن نے قید کرلیا۔ میں ان میں طویل عرصہ رہا۔ مؤمن یا مسلم جنوں نے ان سے لڑائی کی۔ اس کے بارے میں سعید نے شک کیا ہے۔ انھوں نے ان سے قتال کیا اور ان پر غلبہ پایا۔ مومن جنوں نے ان کے جنوں کو قید کیا اور مجھے بھی قیدی بنایا۔ انھوں نے کہا : ہم تجھے مسلمان آدمی سمجھتے ہیں اور ہمارے لیے تجھے قیدی بنانا حلال نہیں ہے۔ انھوں نے مجھے وہاں رہنے اور اپنے گھر کی طرف لوٹنے کے درمیان اختیار دیا۔ میں نے اپنے اہل کی طرف لوٹنے کو اختیار کیا اور وہ میرے ساتھ آئے۔ رات کو آئے یا دن کو آئے۔ انھوں نے مجھے یہ بیان نہیں کیا۔ میں نے ان کی ہوا کی پیروی کی۔ اس کو عمر (رض) نے کہا : تیرا ان میں کھانا کیا تھا ؟ اس نے کہا : لوبیا اور وہ چیز جس پر اللہ کا نام نہ لیا تھا۔ عمر (رض) نے فرمایا : اس میں تیرا پینا کیا تھا ؟ اس نے کہا : جدف۔ قتادہ فرماتے ہیں : جدف وہ شراب ہے جو سکر پیدا ہونے سے پہلے استعمال کرتے ہیں۔ عمر (رض) نے اس کو حق مہر اور اس کی بیوی کے درمیان اختیار دیا۔ سعید فرماتے ہیں اور مجھے مطر نے ابو نضرہ سے حدیث بیان کی انھوں نے عبدالرحمن بن ابی لیلیٰ سے وہ عمر (رض) سے قتادہ کی حدیث کی طرح نقل فرماتے ہیں۔ مگر مطر نے اس میں کچھ زیادہ کیا ہے۔ فرماتے ہیں : اس کو حکم دیا کہ وہ چار سال چار ماہ اور دس دن انتظار کرے۔