(١٥٨٢٧) سعید بن جبیر فرماتے ہیں کہ مجھے عبدالرحمن بن أبزی نے حکم دیا کہ میں ابن عباس سے ان دو آیات کے متعلق پوچھوں کہ ان کا کیا مطلب ہے۔ پہلی آیت سورة الفرقان کی : { وَالَّذِیْنَ لاَ یَدْعُوْنَ مَعَ اللّٰہِ اِلٰہًا آخَرَ۔۔۔} الی قولہ { وَلَا یَزْنُوْنَ } [الفرقان : ٦٨] اور دوسری آیت سورة النساء کی ٩٣ نمبر آیت { وَ مَنْ یَّقْتُلْ مُؤْمِنًا مُّتَعَمِّدًا۔۔۔} الی آخر القول [النساء ٩٣] تو میں نے ابن عباس سے پوچھا : تو فرمایا : سورة الفرقان والی آیت مشرکین مکہ کے بارے میں ہے؛ کیونکہ شرک کی حالت میں ہم سے ناحق قتل بھی ہوئے، ہم نے شریک بھی بنائے اور برے کام بھی سرزد ہوئے تو اللہ تعالیٰ نے یہ فرما دیا : { اِلَّا مَنْ تَابَ وَاٰمَنَ } الی قولہ { حَسَنَاتٍ } [الفرقان ٧٠] اور سورة النساء والی آیت اس شخص کے بارے میں ہے جو شرائع اسلام کو جانتا ہو پھر وہ قتل کرتا ہے تو اس کی کوئی توبہ قبول نہیں۔ میں نے یہ بات مجاہد کو سنائی تو انھوں نے فرمایا : جو اپنے کیے پر نادم ہو وہ اس میں شامل نہیں۔