(١٥٨٤٧) اسامہ بن زید (رض) سے روایت ہے کہ ہمیں رسول اللہ (صلی اللہ علیہ وآلہ وسلم) نے حرقات کی طرف ایک لشکر میں روانہ کیا۔ ابتدائی حملہ کے بعد ان میں بھگدڑ مچ گئی۔ ہم نے ایک آدمی کو گرفتار کیا تو وہ لا الہ الا اللہ کہنے لگا : لیکن ہم نے اسے قتل کردیا۔ مجھے یہ بات دل میں کھٹکنے لگی۔ میں نے رسول اللہ (صلی اللہ علیہ وآلہ وسلم) سے اس کا ذکر کیا تو آپ فرمانے لگے : قیامت کے دن تو لا الاہ الہ اللہ کا کیا جواب دے گا ؟ میں نے کہا : اے اللہ کے رسول ! اس نے تو اسلحہ اور قتل کے خوف سے پڑھا تھا تو آپ نے فرمایا : کیا تو نے اس کا سینہ پھاڑ کے دیکھا تھا کہ کس وجہ سے اس نے کلمہ پڑھا ہے۔ اے اسامہ ! اس لا الہ الا اللہ کا تو قیامت کے دن کیا جواب دے گا ؟ فرماتے ہیں کہ آپ یہ بات بار بار دہراتے رہے کہ میں سوچنے لگا، کاش ! میں آج ہی مسلمان ہوا ہوتا۔ ابو ظبیان کہتے ہیں کہ سعد نے فرمایا کہ میں اسے قتل نہ کرتا یہاں تک کہ اسے اسامہ نے قتل کردیا تو ایک آدمی کہنے لگا : کیا اللہ کا یہ فرمان نہیں ہے کہ { وَقٰتِلُوْھُمْ حَٰتّٰی لَا تَکُوْنَ فِتْنَۃٌ} [البقرۃ ١٩٣] تو سعد فرمانے لگے : ہم فتنہ کے ختم ہونے تک لڑے تو اور تیرے ساتھ کیا یہ چاہتے ہیں کہ ہم لڑیں یہاں تک کہ فتنہ برپا ہوجائے۔