(١٦٣٨٢) ابوملیح ہذلی اپنے والد سے روایت کرتے ہیں کہ حمل بن مالک بن نابغہ نے دو عورتوں سے شادی کی۔ ان میں سے ایک بنو معاویہ سے اور دوسری بنو لحیان سے تھی۔ بنو لحیان کی عورت کو دوسری نے مارا وہ مرگئی اور اس کا بچہ بھی ساقط ہوگیا تو مالک اس کے باپ کے پاس آیا اور اپنی بیوی اور بچے کی دیت طلب کی تو اس کا والد کہنے لگا کہ اس کی دیت اس کا بیٹا ادا کرے گا جھگڑا نبی (صلی اللہ علیہ وآلہ وسلم) کے پاس آیا تو آپ (صلی اللہ علیہ وآلہ وسلم) نے فرمایا : اس کے عصبہ دیت ادا کریں اور مسقوط بچے کے بدلے ایک غلام یا لونڈی دیں۔ ولی کہنے لگا کہ جو پیدا نہیں ہوا نا چیخا نا چلایا اس کی دیت کیسی ؟ تو آپ نے فرمایا : یہ جاہلیت کی طرح واویلا کررہا ہے ؟ آپ کو بتایا گیا : یہ شاعر ہے۔ اس نے کہا : اے اللہ کے رسول ! ان کے پاس نہ تو غلام ہے اور نہ لونڈی۔ فرمایا : پھر ١٠ اونٹ۔ بتایا گیا : اس کے پاس تو ہے ہی کچھ نہیں تو آپ نے فرمایا : بنو لحیان کی صدقہ سے مدد کی جائے تو لوگوں نے مدد کی حتی کہ دیت پوری ہوگئی۔