(١٦٤٦٦) ابن عباس (رض) فرماتے ہیں کہ جاہلیت میں پہلا قسامہ ہمارے درمیان تھا کہ بنو ہاشم کے ایک شخص نے قریش کی دوسری شاخ کے ایک آدمی کو اجرت پر رکھا۔ وہ اس کے اونٹ لے کر گیا تو بنو ہاشم کا ایک اور شخص اسے ملا اس کے اونٹ کے لگام کا کڑا ٹوٹ گیا تھا۔ تو اس نے ایک رسی مانگی کہ جس سے وہ کڑا باندھ لے کہ اونٹ بھاگے نہ تو اس نے اسے ایک رسی دے دی جس سے اس نے اپنا کڑا باندھ لیا۔ جب وہ اترے تو سب اونٹ باندھ دیے ایک نہ باندھا تو اس کے مالک نے پوچھا : اس کو کیوں نہیں باندھا ؟ کہا : اس کی رسی نہیں ہے۔ پوچھا : کہاں گئی۔ تو بولا ایک بنی ہاشم کا آدمی گزرا تھا اور مکمل بات بتائی تو اس نے اسے لاٹھی ماری جس سے وہ مرگیا۔ وہاں سے یمن کے ایک آدمی کا گزر ہوا تو اس کے قریب الموت آدمی نے کہا کہ کیا تم حج کے موسم میں مکہ جاؤ گے ؟ کہا : نہیں لیکن عنقریب میں جاؤں گا۔ کہا : میری طرف ایک پیغام وہاں پہنچا دو گے ؟ کہا : ہاں تو اسے وہ پیغام لکھ کردیا کہ پہلے قریش کو پکارنا ؟ پھر بنو ہاشم کو اور پھر ان میں سے ابو طالب کے بارے میں پوچھنا اور انھیں کہنا کہ فلاں نے مجھے ایک رسی کے بدلے قتل کیا ہے وہ فوت ہوگیا جو اونٹوں کا مالک تھا، وہ مکہ آیا تو ابو طالب نے اس سے پوچھا : ہمارا ساتھی کہاں ہے تو اس نے کہا : بیمار ہوا، میں نے اچھی طرح اس کا خیال رکھا لیکن وہ مرگیا تو میں نے اسے دفنا دیا۔ اس شخص کے اہل کچھ عرصہ ٹھہرے کہ وہ یمانی شخص آگیا اور موسم حج میں آل قریش کو پکارا، انھوں نے جواب دیا : یہ آلِ قریش ہے، پھر نبی ہاشم کو پکارا کہا گیا : یہ بنو ہاشم ہیں۔ پوچھا : ابو طالب کہاں ہیں ؟ کہا : یہ ابو طالب ہیں تو وہ شخص کہنے لگا کہ مجھے فلاں شخص نے قبل الموت یہ پیغام دیا تھا کہ فلاں نے اسے ایک رسی کے بدلے قتل کیا ہے تو ابو طالب نے قاتل کو بلایا اور کہا : اب ان میں سے جو چاہو پسند کرلو یا تو دیت کے ١٠٠ اونٹ ادا کرو یا پھر ٥٠ آدمی تمہاری برات پر قسم اٹھائیں، اگر انکار کرو گے تو ہم تمہیں بدلے میں قتل کریں گے۔ وہ اپنی قوم کے پاس آیا اور سارا واقعہ سنایا، انھوں نے کہا : ہم قسم اٹھاتے ہیں تو ایک بنو ہاشم کی عورت جو قاتل کے قوم کے ایک شخص کی بیوی تھی اور اس سے اس کا بچہ بھی تھا ابو طالب کے پاس آئی اور کہنے لگی : اے ابو طالب اس شخص کو اس بچے کے لیے ان ٥٠ آدمیوں سے الگ کر دے جو قسم اٹھانے والے ہیں تو ابو طالب نے کردیا۔ پھر ایک شخص آیا کہ اے ابو طالب ٥ آدمیوں پر دیت کے ٢، ٢ اونٹ آتے ہیں، مجھ سے دو اونٹ لے لو قسم نہ لو۔ ابو طالب نے دونوں سے قبول کرلیا باقی ٤٨ آدمی آئے اور قسم اٹھالی۔ ابن عباس (رض) کہتے ہیں کہ واللہ ! ایک سال بھی نہیں گزرا تھا کہ ان ٤٨ میں سے ایک بھی نہیں بچا تھا۔