(١٦٤٨٧) عمرو بن شعیب فرماتے ہیں کہ کنانہ کے ایک قتادہ نامی آدمی نے کسی وجہ سے اپنے بیٹے کو تلوار سے مارا۔ اس کا پاؤں کٹ گیا، وہ مرگیا۔ یہ بات حضرت عمر کو پتہ چلی تو کہا کہ میں ضرور قتادہ کو قتل کروں گا تو سراقہ بن مالک آئے اور کہنے لگے : اس نے جان بوجھ کر قتل نہیں کیا۔ جب حضرت عمر (رض) کو بات سمجھ آگئی تو فرمایا : اسے کہو : ١٢٠ اونٹ لائے تو وہ لایا۔ حضرت عمر نے اس سے ٣٠ حقے، ٣٠ جذعے اور ٤٠ ثنیہ اونٹ لیے اور قتادہ کو کہا کہ اگر میں نے نبی (صلی اللہ علیہ وآلہ وسلم) سے یہ نہ سنا ہوتا کہ قاتل کے لیے میراث نہیں ہے تو میں تجھے وارث بناتا۔ پھر مقتول کے بھائی کو بلایا اور اسے دیت دے دی۔