(١٦٨٧٩) حضرت سعد فرماتے ہیں کہ فتح مکہ کے دن نبی (رض) نے چار مردوں اور دو عورتوں کے علاوہ تمام کو امن دے دیا اور ان کے بارے میں فرمایا : اگر یہ کعبہ کے پردے سے بھی چمٹے ہوں تب بھی انھیں قتل کر دو ۔ وہ چار یہ ہیں : عکرمہ بن ابی جہل، ابن خطل، مقیس بن حبابہ، عبداللہ بن سعد بن ابی سرح۔ ان میں ابن خطل کعبہ کے پردے سے چمٹا مل گیا تو عمار بن یاسر اور سعید بن زید اس کی طرف دوڑے۔ عمار نوجوان تھے اس لیے انھوں نے اسے پہنچ کر قتل کردیا۔ مقیس بن صبابہ کو بازار میں لوگوں نے قتل کردیا۔ عکرمہ سمندر میں سفر پر چلا گیا کہ کشتی ڈوبنے لگی تو لوگ کہنے لگے : خالص ہو کر اللہ کو پکارو تمہارے معبود تمہیں نہیں بچا سکتے۔ تو عکرمہ کہنے لگے : جو سمندر میں نہیں بچا سکتے تو پھر خشکی پر کیسے بچائیں گے تو اس نے دعا کی : اے اللہ ! میرا تیرے ساتھ عہد ہے اگر تو نے مجھے عافیت دی تو میں نبی (صلی اللہ علیہ وآلہ وسلم) کے ہاتھ میں ہاتھ دوں گا اور ان کو میں درگزر کرنے والا کریم پاؤں گا۔ تو یہ آئے اور مسلمان ہوگئے۔ اور جو عبداللہ بن سعد بن ابی سرح نے حضرت عثمان کے پاس پناہ لی۔ وہ اسے نبی (صلی اللہ علیہ وآلہ وسلم) کے پاس لے آئے کہ آپ کی بیعت کرلیں۔ آپ نے اپنا سر اٹھایا اور تین مرتبہ انکار کیا۔ پھر بیعت کرلی، پھر اپنے صحابہ کی طرف متوجہ ہوئے کہ کیا تم میں کوئی سمجھ دار آدمی نہیں ہے۔ میں نے اس سے بیعت کو اس لیے روکا کہ کوئی اسے قتل کر دے تو انھوں نے کہا : یا رسول اللہ ہمیں کیا پتہ تھا کہ آپ کے دل میں کیا ہے ؟ آنکھ سے اشارہ کردیتے تو آپ (صلی اللہ علیہ وآلہ وسلم) نے فرمایا : آنکھ سے اشارہ کرنا کسی نبی کی شان نہیں ہے۔