(١٧١١٩) ابوہریرہ فرماتے ہیں کہ جب نبی (صلی اللہ علیہ وآلہ وسلم) مدینہ میں آئے تو تمام یہود بیت المدراس میں جمع ہوگئے اور ان میں سے ایک شادی شدہ مرد و عورت نے زنا کرلیا تو وہ کہنے لگے : ان دونوں کو محمد (صلی اللہ علیہ وآلہ وسلم) کے پاس لے چلو، وہ کیا فیصلہ کرتے ہیں۔ اگر وہ تمہیں اس کا حکم دیں کہ ان کے منہ کالے کر کے گدھے پر بٹھائے جائیں اور کوڑے مارے جائیں تو وہ بادشاہ ہیں، ان کی بات مان لینا۔ اگر وہ تمہیں رجم کا حکم دیں تو ان کی بات چھوڑ دینا۔ جب وہ نبی (صلی اللہ علیہ وآلہ وسلم) کے پاس آئے اور بتایا کہ انھوں نے زنا کیا ہے اور شادی شدہ ہیں تو آپ فیصلہ فرمائیں تو نبی (صلی اللہ علیہ وآلہ وسلم) بیت المدراس کی طرف گئے اور لوگوں کو کہا کہ اپنے سب سے بڑے علماء کو نکالو تو انھوں نے عبداللہ بن صوریا اعور کو نکالا اور کہا : یہ ہمارے علماء ہیں بنوقریظہ کے ایک شخص نے بتایا کہ انھوں نے ابن صوریا کے ساتھ ابو بن اخطب اور وہب بن پھوذا کو نکالا اور کہا : یہ ہمارے علماء ہیں۔ جب ان میں آپس میں اختلاف ہوا تو انھوں نے ابن صوریا پر فیصلہ چھوڑ دیا اور کہا : یہی توراۃ کے سب سے بڑے عالم ہیں۔ چنانچہ آپ (صلی اللہ علیہ وآلہ وسلم) ابن صوریا کو تنہائی میں لے گئے اور نوجوان تھے آپ (صلی اللہ علیہ وآلہ وسلم) نے اس سے مسئلہ میں غور و فکر کیا اور اسے اللہ کی قسم اور اللہ کی بنی اسرائیل پر نعمتیں یاد دلا کر پوچھا کہ کیا شادی شدہ زانی کے لیے توراۃ میں رجم نہیں ہے ؟ اس نے کہا : واللہ ہاں ہے، لیکن اے ابو القاسم ! یہ جانتے ہیں کہ آپ مبعوث نبی ہیں لیکن یہ آپ سے حسد کرتے ہیں تو نبی (صلی اللہ علیہ وآلہ وسلم) نکلے اور مسجد بنو غنم بن مالک کے دروازے کے پاس ان کو رجم کردیا۔ اس کے بعد ابن صوریا نے کفر کردیا تو اللہ تعالیٰ نے یہ آیت نازل فرما دی : { یٰٓاَیُّھَا الرَّسُوْلُ لَا یَحْزُنْکَ الَّذِیْنَ یُسَارِعُوْنَ فِی الْکُفْرِ } الی قولہ { لَمْ یَاْتُوْکَ } [المائدۃ ٤١] یعنی وہ لوگ جو آپ کے پاس نہیں آئے اور انھوں نے بھیجا اور خود پیچھے رہ گئے اور انھوں نے لوگوں کو اس کا حکم دیا جو انھیں حکم نہیں دیا گیا تھا، یعنی انھوں نے احکامات میں تحریفکر ڈالی اور وہ کہتے کہ اگر وہ تمہیں تتجبیہ کا حکم دیں تو لے لینا اور اگر رجم کا حکم دیں تو چھوڑ دینا۔