(١٧٣٢) سیدنا سلیمان بن بریدہ اپنے والد سے نقل فرماتے ہیں کہ نبی (صلی اللہ علیہ وآلہ وسلم) کے پاس ایک آدمی آیا اور نماز کے اوقات کے متعلق سوال کیا۔ آپ (صلی اللہ علیہ وآلہ وسلم) نے فرمایا : ہمارے ساتھ ان دو وقتوں میں نماز پڑھیں۔ جب سورج ڈھل گیا تو آپ (صلی اللہ علیہ وآلہ وسلم) نے بلال (رض) کو حکم دیا، انھوں نے اذان کہی، پھر آپ (صلی اللہ علیہ وآلہ وسلم) نے حکم دیا، انھوں نے ظہر کی اقامت کہی، پھر آپ (صلی اللہ علیہ وآلہ وسلم) نے حکم دیا تو انھوں نے عصر کی اقامت کہی اور سورج بلند سفید اور صاف تھا، پھر آپ (صلی اللہ علیہ وآلہ وسلم) نے حکم دیا تو انھوں نے مغرب کی اقامت کہی، جس وقت سورج کا کنارہ غائب ہوگیا، پھر آپ (صلی اللہ علیہ وآلہ وسلم) نے حکم دیا تو انھوں نے عشا کی اقامت کہی جس وقت سرخی غائب ہوگی، پھر آپ (صلی اللہ علیہ وآلہ وسلم) نے حکم دیا تو انھوں نے فجر کی اقامت کہی جس وقت فجر طلوع ہوگئی، جب اگلا دن ہوا آپ (صلی اللہ علیہ وآلہ وسلم) نے حکم دیا تو انھوں نے ظہر کی اقامت کہی، آپ (صلی اللہ علیہ وآلہ وسلم) نے اس کو خوب اچھی طرح ٹھنڈا کیا، پھر حکم دیا تو انھوں نے عصر کی اقامت کہی اور سورج سفید تھا، آپ (صلی اللہ علیہ وآلہ وسلم) نے اس کو پہلے سے زیادہ مؤخر کیا اور حکم دیا تو انھوں نے مغرب کی اقامت کہی، سرخی غائب ہونے سے پہلے اور آپ (صلی اللہ علیہ وآلہ وسلم) نے حکم دیا تو انھوں نے عشا کی اقامت کہی جس وقت تہائی رات کا وقت چلا گیا اور پھر آپ (صلی اللہ علیہ وآلہ وسلم) نے حکم دیا تو انھوں نے فجر کی اقامت کہی اور اس کو روشن کیا، پھر آپ (صلی اللہ علیہ وآلہ وسلم) نے فرمایا : (یہ ہے) تمہاری نماز کا وقت جس طرح تم نے دیکھا ہے۔
ابو ایوب نے اپنی حدیث میں زیادہ کیا ہے کہ پھر آپ نے فرمایا : کہاں ہے نماز کے وقت کا سوال کرنے والا۔ اس شخص نے کہا : میں (یہاں) ہوں، اے اللہ کے رسول ! آپ (صلی اللہ علیہ وآلہ وسلم) نے فرمایا : تمہاری نماز کا وقت اس کے درمیان ہے جو تم نے دیکھا ہے۔