(١٧٣٨٠) حضرت ابن عباس (رض) کے پاس کچھ لوگ آئے اور انھوں نے شراب کی خریدو فروخت کے بارے میں سوال کیا تو ابن عباس (رض) نے پوچھا : مسلمان ہو ؟ کہا : ہاں تو آپ (رض) نے فرمایا : اس کی تجارت صحیح نہیں ہے اور فرمایا : بنی اسرائیل پر چربی حرام کی گئی تھی تو انھوں نے اس کو بیچ کر اس کی قیمت کو کھایا۔ انھوں نے پھر کہا : طلاء کے متعلق آپ کا کیا خیال ہے ؟ آپ نے پوچھا : یہ طلاء کیا ہے ؟ انھوں نے کہا : یہ انگور کو نچوڑ کر اسے پکایا جاتا ہے، پھر اسے دنان میں رکھ دیا جاتا ہے۔ پوچھا : دنان کیا ہے ؟ کہا : یہ ایک تار کول لگا ہوا مٹکا ہے۔ پوچھا : کیا اس میں نشہ ہوتا ہے ؟ کہا : جب زیادہ ہو تو نشہ ہوجاتا ہے تو فرمایا : ہر نشہ آور چیز حرام ہے۔