(١٧٥٤٣) ابن عباس فرماتے ہیں کہ شرابیوں کو عہد رسالت میں ہاتھوں، جوتیوں اور لاٹھیوں سے مارا جاتا تھا۔ حضرت ابوبکر کے زمانے میں شراب نوشی زیادہ ہوئی تو انھوں نے ٤٠ کوڑے مقرر کردیے۔ پھر حضرت عمر بھی اسی پر کاربند رہے یہاں تک کہ اولین مہاجرین میں سے ایک شخص نے شراب پی (رض) جب اسے حد لگانے کا حکم دیا تو وہ کہنے لگا : مجھے حد کیوں لگا رہے ہو میرے اور آپ کے درمیان کتاب اللہ ہے۔ پوچھا : یہ کون سی کتاب میں ہے کہ میں تجھے حد نہ لگاؤں ؟ کہا : اللہ تعالیٰ فرماتے ہیں کہ ” ان لوگوں پر جو ایمان لانے کے بعد نیک عمل کی کوئی گناہ نہیں اس میں جو وہ کھاتے ہیں “ [المائدۃ ٩٣] میں نبی (صلی اللہ علیہ وآلہ وسلم) کے ساتھ بدر، احد، خندق میں شامل ہوا ہوں۔ حضرت عمر نے کہا : کوئی نہیں ہے جو اسے جواب دے ؟ تو عبداللہ ابن عباس نے فرمایا : یہ آیت تو پہلوں کے لیے نازل ہوئی ہے کہ حرمت خمر سے پہلے جو وہ کرچکے ہیں، ان پر اس کا گناہ نہیں اور باقیوں کے لیے تو حجت ہے کہ ان کے لیے اللہ تعالیٰ نے یہ آیت نازل فرمائی : { یٰٓاَیُّھَا الَّذِیْنَ اٰمَنُوْٓا اِنَّمَا الْخَمْرُ وَ الْمَیْسِرُ وَ الْاَنْصَابُ وَ الْاَزْلَامُ رِجْسٌ} [المائدۃ ٩٠] تو اگر اہل ایمان سے ہے نیک عمل کرتا ہے تو پھر اللہ سے ڈرنا چاہیے، احسان کرنا چاہیے اور اللہ نے شراب سے منع کیا ہے تو حضرت عمر نے لوگوں سے پوچھا : تمہاری کیا رائے ہے تو حضرت علی نے فرمایا : اگر شراب پئے گا تو نشہ ہوگا پھر بہکے گا اور پھر تہمت بھی لگائے گا۔ لہٰذا اس کی سزا ٨٠ کوڑے ہے تو حضرت عمر نے ٨٠ کوڑے مارنے کا حکم دیا۔