(١٧٨٨) سیدنا زیاد بن حارث صدائی فرماتے ہیں کہ میں رسول اللہ (صلی اللہ علیہ وآلہ وسلم) کے پاس آیا : اور اسلام پر بیعت کی ۔۔۔ ، فرماتے ہیں کہ جب صبح کی اذان کا وقت ہوا تو آپ (صلی اللہ علیہ وآلہ وسلم) نے مجھ کو حکم دیا، میں نے اذان کہی۔ پھر میں کہنے لگا اے اللہ کے رسول ! میں اقامت کہوں ؟ رسول اللہ (صلی اللہ علیہ وآلہ وسلم) مشرقی کنارے کی طرف فجرکو دیکھ رہے اور آپ (صلی اللہ علیہ وآلہ وسلم) نے فرمایا نہیں جب تک فجر طلوع نہ ہوجائے، رسول اللہ (صلی اللہ علیہ وآلہ وسلم) اترے، آپ نے قضائے حاجت کی، پھر میری طرف پھرے اور آپ (صلی اللہ علیہ وآلہ وسلم) کے صحابہ کرام ملے ہوئے تھے، آپ (صلی اللہ علیہ وآلہ وسلم) نے فرمایا : اے صداء کے بھائی ! کیا تیرے پاس پانی ہے ؟ میں نے کہا : ہاں تھوڑا سا ہے، جو آپ کو کافی نہیں ہوگا۔ نبی (صلی اللہ علیہ وآلہ وسلم) نے فرمایا : اس کو برتن میں انڈیل کر میرے پاس لا، میں نے ایسے ہی کیا، آپ (صلی اللہ علیہ وآلہ وسلم) نے اپنی ہتھیلی پانی میں رکھی۔ صدائی کہتے ہیں : میں نے دیکھا آپ (صلی اللہ علیہ وآلہ وسلم) کی انگلیوں کے درمیان سے چشمہ پھوٹا ہوا تھا، رسول اللہ (صلی اللہ علیہ وآلہ وسلم) نے فرمایا : اگر میں اپنے رب سے حیا نہ کرتا تو ہم پیتے اور پلاتے، میرے صحابہ کو آواز دے جس کو پانی ضرورت ہے (لے لے) میں نے انھیں آواز دی تو پانی لیا جس نے چاہا، پھر رسول اللہ (صلی اللہ علیہ وآلہ وسلم) نماز کے لیے کھڑے ہوئے، سیدنا بلال (رض) نے اقامت کہنے کا ارادہ کیا تو ان سے نبی (صلی اللہ علیہ وآلہ وسلم) نے فرمایا : صداء کے بھائی نے اذان دی ہے اور جو اذان دے وہی اقامت کہے۔ صدائی کہتے ہیں : میں نے نماز کی اقامت کہی۔