(١٨٠٦٦) حضرت عمران بن حصین فرماتے ہیں کہ صحابہ نے بنو عقیل کا ایک شخص قیدی بنا کر باندھ کر پتھریلی زمین میں پھینک دیا۔ رسول محترم (صلی اللہ علیہ وآلہ وسلم) اس کے پاس سے گزرے۔ ہم بھی آپ کے ہمراہ تھے۔ آپ ایک گدھے پر سوار تھے۔ آپ (صلی اللہ علیہ وآلہ وسلم) کے نیچے ایک چادر تھی تو اس نے آپ (صلی اللہ علیہ وآلہ وسلم) کو آواز دی : اے محمد ! اے محمد ! آپ (صلی اللہ علیہ وآلہ وسلم) اس کے پاس آئے۔ آپ (صلی اللہ علیہ وآلہ وسلم) نے پوچھا : کیا بات ہے ؟ اس نے کہا : مجھے کیونکر پکڑا گیا ہے ؟ اور حج کی طرف جانے والے کو کیوں پکڑا گیا ؟ آپ (صلی اللہ علیہ وآلہ وسلم) نے فرمایا : تو پکڑا گیا ہے تیرے حلیف بنو ثقیف کے جرم کی پاداش میں اور بنو ثقیف نے دو صحابہ کو قیدی بنا لیا تھا۔ آپ (صلی اللہ علیہ وآلہ وسلم) اس کو چھوڑ کر چل دیے۔ اس نے پھر آواز دی : اے محمد ! اے محمد ! رسول رحمت (صلی اللہ علیہ وآلہ وسلم) کو اس پر رحم آگیا۔ آپ (صلی اللہ علیہ وآلہ وسلم) واپس آگئے۔ آپ (صلی اللہ علیہ وآلہ وسلم) نے پوچھا : کیا بات ہے ؟ اس نے کہا : میں تو مسلمان ہوں۔ آپ (صلی اللہ علیہ وآلہ وسلم) نے فرمایا : اگر تو اس وقت یہ بات کہہ دیتا جب تو آزار تھا تو ہر طرح سے کامیاب ہوجاتا ۔ راوی کہتے ہیں : آپ (صلی اللہ علیہ وآلہ وسلم) اس کو چھوڑ کر چل دیے تو اس نے آواز دی : اے محمد ! اے محمد ! آپ (صلی اللہ علیہ وآلہ وسلم) واپس آگئے۔ اس نے کہا : میں بھوکا ہوں، مجھے کھانا کھلاؤ۔ راوی کہتے ہیں : میرا گمان ہے : اس نے کہا : میں پیاسا ہوں مجھے پانی پلاؤ۔ آپ (صلی اللہ علیہ وآلہ وسلم) نے فرمایا : یہ تیری ضرورت ہے۔ راوی کہتے ہیں : رسول اکرم (صلی اللہ علیہ وآلہ وسلم) نے اس کے عوض اپنے دو آدمیوں کو رہا کروایا جس کو بنو ثقیف نے قید کرلیا تھا۔ آپ (صلی اللہ علیہ وآلہ وسلم) نے اس کی اونٹنی بھی لے لی۔