(١٨١٠٢) جابر بن عبداللہ فرماتے ہیں کہ رسول اللہ (صلی اللہ علیہ وآلہ وسلم) نے فرمایا : کعب بن اشرف کو کون قتل کرے گا، اس نے اللہ اور اس کے رسول (صلی اللہ علیہ وآلہ وسلم) کو تکلیف دی ہے ؟ محمد بن مسلمہ کہنے لگے : اے اللہ کے رسول ! کیا آپ (صلی اللہ علیہ وآلہ وسلم) پسند کریں گے کہ میں اس کو قتل کر دوں ؟ آپ (صلی اللہ علیہ وآلہ وسلم) نے فرمایا : ہاں ! اس نے کہا : اے اللہ کے رسول ! میں اس کو قتل کروں گا لیکن آپ (صلی اللہ علیہ وآلہ وسلم) مجھے کچھ باتیں کہنے کی اجازت دیں۔ آپ (صلی اللہ علیہ وآلہ وسلم) نے فرمایا : کہہ لے۔ محمد بن مسلمہ اس کے پاس آئے اور کہنے لگے : اس شخص (یعنی محمد (صلی اللہ علیہ وآلہ وسلم) ) نے ہم سے صدقہ لیا۔ ہم پر سختی کی اور ہم اس سے اکتا گئے ہیں۔ خبیث انسان نے جب یہ باتیں سنیں اور یہ بھی کہا کہ اللہ کی قسم ! تم ضرور اس سے اکتا جاؤ گے اور مجھے معلوم تھا کہ تمہارا معاملہ یہاں تک پہنچ جائے گا۔ راوی کہتے ہیں کہ ہم اس کو چھوڑ نہیں سکتے، یہاں تک کہ ہم دیکھ لیں کہ وہ کیا کرتا ہے اور ہم اس کی اتباع کے بعد چھوڑنا ناپسند کرتے ہیں یہاں تک کہ ہم دیکھ لیں کہ اس کا معاملہ کہاں تک پہنچتا ہے۔ میں تیرے پاس آیا ہوں تاکہ مجھے کھجوریں ادھار دو ۔ اس نے کہا : ٹھیک ہے لیکن تم اپنی عورتیں میرے پاس گروی رکھ دو ۔ محمد بن مسلمہ نے کہا : آپ عرب میں سب سے زیادہ حسین ہیں۔ ہم آپ کے پاس اپنی عورتیں گروی رکھ دیں۔ اس نے کہا : اپنی اولاد گروی رکھ دو ۔ محمد بن مسلمہ کہتے ہیں کہ لوگ ہماری اولاد کو عار دلائیں گے کہ ہم نے انھیں ایک وسق یا دو وسق کے بدلے گروی رکھ دیا تھا اور بعض اوقات ہماری اولاد کو گالی دی جائے کہ یہ وہ شخص ہے جسے ایک یا دو وسق کے بدلے گروی رکھا گیا۔ اس نے کہا : کون سی چیز تم میرے پاس گروی رکھو گے ؟ محمد بن مسلمہ کہنے لگے : ہم آپ کے پاس ہتھیار گروی رکھیں گے۔ اس نے کہا : درست ہے۔ اس نے وعدہ لیا کہ وہ اس کے پاس آئے گا۔ محمد بن مسلمہ پلٹ کر اپنے ساتھیوں کے پاس آئے اور ان کے ساتھ ابو نائلہ جو کعب کے رضاعی بھائی ہیں اور دو دوسرے آدمی بھی آئے۔ اس نے کہا : میں اس کے سر کو مضبوطی سے پکڑ لوں گا۔ جب میں اپنا ہاتھ اس کے سر میں داخل کروں تو تم حملہ کردینا۔ وہ ایک رات آئے اور محمد بن مسلمہ نے اپنے ساتھیوں سے کہا کہ وہ کھجور کے سائے میں کھڑے ہوجائیں۔ محمد بن مسلمہ نے آ کر آواز دی۔ اے ابو الاشرف ! تو اس کی بیوی نے کہا : آپ اس وقت کہاں جائیں گے ؟ اس نے کہا : محمد بن مسلمہ اور ابو نائلہ میرا بھائی ہے۔ وہ ایک کپڑے میں لپٹا ہوا اترا، جس سے خوشبو پھوٹ رہی تھی۔ محمد بن مسلمہ نے کہا : تیرا جسم کتنا حسین اور تیری خوشبو عمدہ ہے۔ اس نے کہا : میرے نکاح میں فلاں کی بیٹی ہے اور یہ عرب میں سب سے زیادہ بہتر خوشبو والی ہے۔ محمد نے کہا : ہاں ! اور اپنا ہاتھ اس کے سر میں داخل کیا اور اس کی خوشبو اپنے ساتھیوں کو سونگھائی۔ پھر دوسری مرتبہ اپنے ہاتھ سے اس کے سر اور پیشانی کے بالوں کو مضبوطی سے پکڑ لیا۔ پھر اپنے ساتھیوں سے کہا : اللہ کے دشمن پر حملہ کر دو تو انھوں نے نکل کر اس کو قتل کردیا پھر انھوں نے آ کر رسول اللہ کو خبر دی۔