(١٨٢٧٥) عبداللہ بن رباح انصاری حضرت ابوہریرہ (رض) سے نقل فرماتے ہیں کہ نبی (صلی اللہ علیہ وآلہ وسلم) جب مکہ میں داخل ہوئے تو زبیر بن عوام، ابو عبیدہ بن جراح اور خالد بن ولید (رض) کو لشکر پر روانہ فرمایا اور فرمایا : اے ابوہریرہ ! انصار کو آواز دو کہ تم اس راستہ پر چلو۔
تو اعلان کرنے والے نے اعلان کیا کہ آج کے بعد قریش نہ ہوں گے۔ آپ (صلی اللہ علیہ وآلہ وسلم) نے فرمایا : جو اپنے گھر میں داخل ہوگیا اس کو امان ہے۔ جس نے ہتھیار پھینک دیے اس کو بھی امن ہے تو قریشی سردار کعبہ میں داخل ہوگئے اور کعبہ ان سے بھر گیا۔ نبی (صلی اللہ علیہ وآلہ وسلم) نے طواف کیا اور مقام ابراہیم کے پیچھے نماز پڑھی۔ پھر آپ (صلی اللہ علیہ وآلہ وسلم) نے دروازے کی چوکھٹ کو پکڑا تو انھوں نے نکل کر نبی (صلی اللہ علیہ وآلہ وسلم) کی اسلام پر بیعت کی۔ (ب) قاسم بن سلام بن مسکین اپنے والد سے اسی سند سے نقل فرماتے ہیں کہ آپ (صلی اللہ علیہ وآلہ وسلم) کعبہ میں آئے اور دروازے کی چوکھٹ کے دو بازؤں کو پکڑا اور فرمایا : تم کیا کہتے ہو، تمہارا کیا گمان ہے ؟ انھوں نے کہا : ہم کہتے ہیں : بھتیجا اور چچے کا بیٹا بردبار رحم کرنے والا ہے۔ راوی کہتے ہیں کہ انھوں نے یہ بات تین مرتبہ کہی تو رسول اللہ (صلی اللہ علیہ وآلہ وسلم) نے فرمایا : میں وہی بات کہتا ہوں جو یوسف (علیہ السلام) نے کہی تھی : { قَالَ لَا تَثْرِیْبَ عَلَیْکُمُ الْیَوْمَ یَغْفِرُ اللّٰہُ لَکُمْ وَ ھُوَ اَرْحَمُ الرّٰحِمِیْنَ ۔ } [یوسف ٩٢] ” فرمایا : تمہارے اوپر کوئی سرزنش نہیں، اللہ تمہیں معاف فرمائے، وہ سب سے زیادہ رحم کرنے والا ہے۔ “ راوی کہتے ہیں کہ وہ نکلے جیسے قبروں سے اٹھائے گئے ہوں اور انھوں نے اسلام قبول کرلیا۔