(١٨٤٤٣) ابو کبشہ سلولی نے سھل بن حنظلہ کو ذکر کرتے ہوئے سنا کہ حنین کے دن وہ نبی (صلی اللہ علیہ وآلہ وسلم) کے ساتھ شام تک چلے۔ نماز کا وقت ہوگیا تو ایک سوار شخص آیا۔ اس نے کہا : اے اللہ کے رسول (صلی اللہ علیہ وآلہ وسلم) ! میں آپ کے آگے فلاں فلاں پہاڑ پر چڑھا کہ اچانک بنو ھوازن نے اپنے والدین، چوپائے اور بکریوں کو حنین میں جمع کر رکھا ہے۔ رسول اللہ (صلی اللہ علیہ وآلہ وسلم) مسکرائے اور فرمایا : ان شاء اللہ یہ کل مسلمانوں کے لیے مال غنیمت ہوگا۔ پھر کہا : آج رات ہمارا پہرہ کون دے گا تو ابوانس بن ابومرثد غنوی نے کہا : اے اللہ کے رسول (صلی اللہ علیہ وآلہ وسلم) ! میں پہرہ دوں گا۔ آپ (صلی اللہ علیہ وآلہ وسلم) نے فرمایا : سوار ہوجا تو وہ اپنے گھوڑے پر سوار ہو کر نبی (صلی اللہ علیہ وآلہ وسلم) کے پاس آئے۔ آپ (صلی اللہ علیہ وآلہ وسلم) نے فرمایا : آپ اس سامنے پہاڑ کی چوٹی پر چڑھ جائیں تو آپ کی جانب سے ہم پر آج رات کوئی حملہ نہ کرلے۔ جب ہم نے صبح کی تو آپ (صلی اللہ علیہ وآلہ وسلم) نے دو رکعت نماز پڑھی۔ پھر پوچھا : کیا تم نے اپنے شاہسوار کو محسوس کیا ہے تو ایک شخص نے کہا : ہم نے محسوس نہیں کیا تو نماز کی اقامت کہہ دی گئی۔ رسول اللہ (صلی اللہ علیہ وآلہ وسلم) مڑ مڑ کر اس گھاٹی کی طرف دیکھتے تھے۔ یہاں تک کہ آپ (صلی اللہ علیہ وآلہ وسلم) نے نماز مکمل کی اور فرمایا : خوش ہوجاؤ۔ تمہارا شاہسوار آگیا ہے تو ہم درختوں کے درمیان سے دیکھ رہے تھے کہ اچانک اس نے آکر رسول اللہ (صلی اللہ علیہ وآلہ وسلم) کے پاس کھڑے ہو کر سلام کہا۔ اس نے کہا : میں آپ (صلی اللہ علیہ وآلہ وسلم) کے حکم کے مطابق اس گھاٹی کی چوٹی پر پہنچا۔ جب میں نے صبح کی تو میں نے دونوں گھاٹیوں کے درمیان نظر دوڑائی۔ میں نے کسی کو نہ دیکھا تو رسول اللہ (صلی اللہ علیہ وآلہ وسلم) نے فرمایا : تو رات کو نیچے اترا تھا۔ اس نے کہا : نماز اور قضائے حاجت کے علاوہ نہیں اترا تو آپ (صلی اللہ علیہ وآلہ وسلم) نے فرمایا : تو نے جنت کو واجب کرلیا ہے تیرے اوپر کوئی حرج نہیں اگر اس کے بعد عمل نہ بھی کرے۔