(١٩٥٥٩) اسامہ بن شریک کہتے ہیں کہ میں رسول اللہ (صلی اللہ علیہ وآلہ وسلم) کے پاس آیا اور صحابہ یوں بیٹھے تھے جیسے ان کے سروں پر پرندے بیٹھے ہوں۔ میں سلام کہہ کر بیٹھ گیا تو ایک اعرابی بھی آگیا۔ اس نے کہا : اے اللہ کے رسول ! کیا ہم دوائی سے علاج کرلیں ؟ فرمایا : علاج کیا کرو کیونکہ اللہ نے ہر بیماری کا علاج رکھا ہے، سوائے بڑھاپے کے۔ راوی کہتے ہیں : اس نے بعض دوسری اشیاء کے بارے میں پوچھا تو آپ (صلی اللہ علیہ وآلہ وسلم) نے فرمایا : کوئی حرج نہیں ہے۔ فرمایا : اللہ کے بندو ! اللہ نے تنگی کو ختم کر ڈالا لیکن جو شخص دوسروں پر ظلم کرتا ہے یہ ہلاکت و پریشانی کا باعث ہے۔ اس نے کہا : اے اللہ کے رسول ! لوگوں کو بہترین چیز کیا عطا کی گئی ؟ فرمایا : اچھا اخلاق۔