(١٩٨٦٢) عبدالرحمن بن ابی بکر فرماتے ہیں کہ ہمارے ہاں مہمان آئے اور میرے والدرات کو نبی (صلی اللہ علیہ وآلہ وسلم) سے بات چیت کرتے تھے، جاتے ہوئے مجھے کہنے لگے : مہمانوں سے فارغ ہوجانا (یعنی کھانا کھلانا) ۔ جب شام کے وقت میں نے کھانا پیش کیا تو انھوں نے کھانے سے انکار کردیا اور کہنے لگے : آپ کے والد ہمارے ساتھ کھائیں گے تو ہم کھانا کھائیں گے۔ کہتے ہیں : میں نے کہا : وہ تیز مزاج والے ہیں، اگر تم نے کھانا نہ کھایا تو مجھے تکلیف کا اندیشہ ہے، لیکن انھوں نے انکار کردیا۔ جب والد صاحب واپس آئے تو سب سے پہلے پوچھا : مہمانوں سے فارغ ہوگئے (یعنی کھانا کھلایا) ۔ انھوں نے کہا : ہم فارغ نہیں ہوئے، فرمایا : کیا میں نے عبدالرحمن کو حکم نہیں دیا تھا۔ فرماتے ہیں : میں چھپ گیا۔ حضرت ابوبکر (رض) نے قسم دے کر آواز دی اگر سنتے ہو تو مجھے جواب دو ۔ کہتے ہیں : میں آیا اور کہا : میرا قصور نہیں۔ آپ اپنے مہمانوں سے پوچھ لیں۔ میں نے کھانا پیش کیا، لیکن انھوں نے یہ کہہ کر کھانا واپس کردیا کہ آپ ان کے ساتھ مل کر کھائیں گے، تب وہ کھائیں گے۔ ابوبکر (رض) فرماتے ہیں، تم نے ہماری مہمانی کو قبول کیوں نہ کیا۔ اللہ کی قسم ! میں آج رات کھانا نہ کھاؤں گا۔ وہ کہنے لگے : اللہ کی قسم ! ہم بھی نہیں کھائیں گے، جب تک آپ نہ کھائیں گے۔ پھر فرماتے ہیں : یہ بدترین چیز ہے کہ تم ہماری جانب سے اپنی مہمانی کو قبول نہ کرو۔ پھر فرمایا : پہلی بات شیطان کی جانب سے تھی۔ کھانا لاؤ بھئی۔ جب صبح کے وقت نبی (صلی اللہ علیہ وآلہ وسلم) کے پاس آئے اور کہنے لگے کہ انھوں نے نیکی کی اور میں نے قسم توڑ دی تو آپ (صلی اللہ علیہ وآلہ وسلم) نے فرمایا : تو ان سے زیادہ نیک اور پسندیدہ ہے فرماتے ہیں : اس میں مجھے کفارہ نہیں پہنچا۔
قول ابوبکر : 1 کھانے کو چھوڑنے پر قسم کھانا مکروہ ہے، لیکن نبی (صلی اللہ علیہ وآلہ وسلم) نے اس کے کفارے کا حکم نہیں دیا۔ 2 ممکن ہے یہ کفارے کے نازل ہونے سے پہلے کی بات ہو، لیکن پہلی بات زیادہ قرینِ قیاس ہے۔