(٢٠٣٣٥) یزید بن حیان فرماتے ہیں کہ میں نے زید بن ارقم (رض) سے سنا کہ ایک دن نبی (صلی اللہ علیہ وآلہ وسلم) ہمارے درمیان کھڑے خطبہ ارشاد فرما رہے تھے۔ آپ نے اللہ کی حمدوثنا کے بعد فرمایا : اے لوگو ! میں انسان ہوں۔ قریب ہے کہ میرے رب کا قاصد آجائے اور میں اس کی بات کو قبول کرلوں (مراد موت) ۔ میں تمہارے اندر دو چیزیں چھوڑ رہا ہوں : 1 اللہ کی کتاب، اس میں ہدایت اور نور ہے۔ تم اللہ کی کتاب کو مضبوطی سے تھامے رکھو۔ پھر اللہ کی کتاب کی ترغیب دی اور ابھارا۔ پھر فرمایا : 2 میرے اہل بیت میں، اپنے اہل بیت کے بارے میں تمہیں نصیحت کرتا ہوں۔