(٢٠٣٩٢) محمود بن ربیع انصاری (رض) فرماتے ہیں کہ عتبان بن مالک جو بدری صحابی ہیں، رسول اللہ (صلی اللہ علیہ وآلہ وسلم) کے پاس آئے اور عرض کیا : میں نابینا ہوں اور اپنی قوم کا امام ہوں۔ جب بارش ہوتی ہے تو میرے اور ان کے درمیان وادی بہہ پڑتی ہے اور میں مسجد میں نہیں آسکتا کہ ان کو نماز پڑھاؤں۔ میں چاہتا ہوں کہ آپ (صلی اللہ علیہ وآلہ وسلم) میرے گھر تشریف لائیں اور نماز پڑھیں، تاکہ میں اس کو اپنی نماز کی جگہ مقرر کرلوں۔ آپ (صلی اللہ علیہ وآلہ وسلم) نے فرمایا : عنقریب میں ایسا کرلوں گا۔ عتبان کہتے ہیں : صبح کے وقت دن کے بلند ہونے کے بعد آپ (صلی اللہ علیہ وآلہ وسلم) اور ابوبکر صدیق (رض) تشریف لائے۔ نبی (صلی اللہ علیہ وآلہ وسلم) نے اجازت مانگی، میں نے اجازت دے دی۔ آپ (صلی اللہ علیہ وآلہ وسلم) گھر میں داخل ہونے کے بعد بیٹھے نہیں بلکہ فرمایا : کہاں پسند کرتے ہو کہ میں نماز پڑھوں۔ کہتے ہیں : میں نے گھر کے ایک کونے کی طرف اشارہ کیا۔ رسول اللہ (صلی اللہ علیہ وآلہ وسلم) کھڑے ہوئے ، ہم نے آپ کے پیچھے صفیں بنالیں، آپ نے دو رکعت نماز پڑھ کر سلام پھیرا۔ ہم نے آپ کے لیے کھانا تیار کیا تھا اس کے لیے روکا۔ گھر کے افراد کو بلایا اور وہ جمع ہوگئے۔ کہنے والے نے کہا : مالک بن دخش کہاں ہے ؟ بعض نے کہا : یہ منافق ہے۔ اللہ اور رسول (صلی اللہ علیہ وآلہ وسلم) سے محبت نہیں کرتا۔ تو نبی (صلی اللہ علیہ وآلہ وسلم) نے فرمایا : ایسے نہ کہو ، کیا اس نے کلمہ اللہ کی خوشنودی کے لیے نہیں پڑھا ؟ اس نے کہا : اللہ اور رسول بہتر جانتے ہیں۔ کہتے ہیں : ہم تو اس کی خوشنودی اور خیر خواہی منافقین کی طرف دیکھتے ہیں تو نبی (صلی اللہ علیہ وآلہ وسلم) نے فرمایا : جس نے اللہ کی خوشنودی کے لیے کلمہ پڑھا اللہ نے اس پر جہنم کی آگ حرام کردی ہے۔ ابن شہاب زہری فرماتے ہیں : پھر میں نے حصین بن محمد انصاری سے سوال کیا جو بنو سالم کے ایک آدمی ہیں اور ان کے سردار ہیں تو انھوں نے بھی محمود بن ربیع کی حدیث کی تصدیق کی۔
(ب) زہری فرماتے ہیں کہ نبی (صلی اللہ علیہ وآلہ وسلم) نے مالک بن دخشن کے بارے میں قول کو قبول نہ کیا کہ وہ منافق ہے، یہاں تک کہ وضاحت ہوگئی کہ کون کہہ رہا ہے، جب اس کے نفاق کی نفی ہے تو آپ (صلی اللہ علیہ وآلہ وسلم) نے اس کا قول رد کردیا۔