(٢٠٧٦٤) حضرت ابوہریرہ (رض) فرماتے ہیں کہ میں نے نبی (صلی اللہ علیہ وآلہ وسلم) سے سنا، آپ (صلی اللہ علیہ وآلہ وسلم) نے فرمایا : جب بندہ گناہ کرتا ہے او کہتا ہے : اے میرے رب ! مجھے معاف فرما تو اللہ فرماتے ہیں کہ میرا بندہ جانتا ہے کہ اس کے گناہ معاف کرنے والا رب ہے، جو اس کا مواخذہ بھی کرسکتا ہے۔ پھر اللہ اس کو معاف کردیتے ہیں، پھر کچھ دیر کے بعد وہ دوبارہ گناہ کرلیتا ہے اور بعض اوقات کئی اور بھی گناہ کرلیتا ہے، پھر کہتا ہے کہ اے اللہ ! میں نے دوسرا گناہ کرلیا ہے، مجھے معاف فرما تو اللہ فرماتے ہیں کہ میرا بندہ جانتا ہے کہ اللہ اس کو معاف کر دے گا اور اس کا مواخذہ بھی کرسکتا ہے، اللہ اس کو معاف کردیتے ہیں۔ پھر وہ کچھ دیر ٹھہرتا ہے، پھر گناہ کرلیتا ہے، پھر کہتا ہے : اے اللہ ! مجھے گناہ معاف کر دے تو اللہ فرماتے ہیں کہ میرا بندہ جانتا ہے کہ اللہ اس کو معاف کردیں گے، اس کا مواخذہ بھی کرسکتا ہے تو اللہ فرماتے ہیں : میں نے تجھے معاف کردیا جو مرضی عمل کر۔