(٢٣٧٢) سیدنا زید بن ثابت (رض) سے روایت ہے کہ ابوبکر (رض) نے مجھے جنگ یمامہ کے میدان کار زار سے واپس بلایا۔ میں ان کی خدمت میں حاضر ہوا تو دیکھا کہ حضرت عمر (رض) بھی تشریف فرما ہیں۔ سیدنا ابوبکر (رض) نے فرمایا : عمر (رض) میرے پاس آئے ہیں اور انھوں نے مجھے بتایا کہ یمامہ کی لڑائی میں قرآن کے قراء شہید ہوگئے ہیں۔ مجھے ڈر ہے کہیں ایسا نہ ہو کہ اسی طرح مختلف محاذوں میں قرآن کے قراء شہید ہوتے رہے تو بہت سا قرآن ضائع ہوجائے گا (جو صرف سینوں میں ہے) ۔ میرا مشورہ ہے کہ آپ قرآن کو جمع کرنے کا حکم فرما دیں۔ میں نے عمر (رض) سے کہا کہ جو کام رسول اللہ (صلی اللہ علیہ وآلہ وسلم) نے نہیں کیا وہ میں کیسے کروں ؟ تو عمر (رض) نے فرمایا : اللہ کی قسم ! یہ کام بہتر ہے اور یہ برابر مجھ سے اس کام کے لیے کہتے رہے یہاں تک کہ اللہ نے میرا سینہ بھی اس کام کے لیے کھول دیا جس کے لیے عمر (رض) کا سینہ کھول دیا تھا اور عمر (رض) کی جو رائے تھی وہی رائے میری بھی قرار پائی۔
آپ نوجوان اور عقل مند آدمی ہیں، ہمیں آپ پر اعتبار بھی ہے اور آپ نبی کریم (صلی اللہ علیہ وآلہ وسلم) کے لیے وحی بھی لکھا کرتے تھے۔ لہٰذا آپ ایسا کریں کے قرآن کو تلاش کر کے اس کو اکٹھا کریں۔ زید بن ثابت (رض) فرماتے ہیں : اللہ کی قسم ! اگر یہ لوگ مجھے پہاڑ ایک جگہ سے دوسری جگہ منتقل کرنے کا حکم دیتے تو مجھ پر اتنا بھاری اور سخت نہ ہوتا جتنا یہ کام مشکل معلوم ہوا۔ میں نے عرض کیا کہ تم لوگ ایسا کام کیوں کرو گے جو رسول اللہ (صلی اللہ علیہ وآلہ وسلم) نے نہیں کیا ؟ تو سیدنا ابوبکر صدیق (رض) نے فرمایا : (اگرچہ نہیں کیا) مگر اللہ کی قسم ! یہ کام بہتر ہے اور وہ مسلسل مجھے اس بارے میں کہتے رہے۔ حتیٰ کہ جس طرح اللہ نے ابوبکر وعمر (رض) کے دل میں یہ بات ڈال دی۔ اسی طرح میرے دل میں بھی ڈال دی اور میری رائے بھی ان کے رائے کی طرح ہوگئی۔ لہٰذا میں نے قرآن کی تلاش شروع کردی، میں اس کو کھجور کی شاخوں، باریک پتھروں اور لوگوں کے سینوں سے جمع کرنا شروع کردیا۔ یہاں تک کہ میں نے سورة توبہ کی آخری آیت { لَقَدْ جَائَ کُمْ رَسُولٌ مِنْ أَنْفُسِکُمْ } [التوبۃ : ١٢٨]۔۔۔ حضرت خزیمہ یا ابوخزیمہ انصاری (رض) کے پاس پائی تو میں نے اس کو سورة توبہ کے ساتھ ملا لیا۔ پھر یہ مصحف سیدنا ابوبکر (رض) کی زندگی میں ان کے پاس رہا، پھر ان کے بعد حضرت عمر (رض) کے پاس رہا حتیٰ کہ وہ فوت ہوگئے۔ پھر حفصہ بنت عمر (رض) کے پاس منتقل ہوگیا۔