(٢٣٨٦) ابن جریج فرماتے ہیں : مجھے میرے والد محترم نے خبر دی کہ سعید بن جبیر نے فرمایا کہ { وَلَقَدْ آتَیْنَاکَ سَبْعًا مِنَ الْمَثَانِی } [الحجر : ٨٧] ” اور ہم نے آپ کو سات بار بار پڑھی جانے والی آیات عطا کیں “ سے مراد سورة فاتحہ ہے۔
(ب) (ابن جریج اپنے والد سے نقل کرتے ہیں کہ مجھ پر سعید بن جبیر نے { بِسْمِ اللَّہِ الرَّحْمَنِ الرَّحِیمِ } تلاوت کی حتی کہ مکمل سورة فاتحہ کو ختم کیا۔ پھر فرمایا : { بِسْمِ اللَّہِ الرَّحْمَنِ الرَّحِیمِ } (سورة فاتحہ کی) ساتویں آیت ہے۔
(ج) سعید بن جبیر نے میرے والد سے کہا : اس سورت کو ابن عباس (رض) نے مجھ پر اسی طرح تلاوت کیا تھا، جس طرح میں نے تیرے سامنے اسے پڑھا ہے۔ پھر فرمایا : { بِسْمِ اللَّہِ الرَّحْمَنِ الرَّحِیمِ } (سورة فاتحہ کی) ساتویں آیت ہے۔
(د) ابن عباس (رض) فرماتے ہیں : اللہ نے یہ سورت تمہارے لیے ذخیرہ کر رکھی تھی، یہ اللہ نے تم سے پہلے کسی امت کے لیے نہیں اتاری۔