(٢٤٦٥) حضرت انس بن مالک (رض) سے روایت ہے کہ ایک انصاری شخص مسجد قبا میں لوگوں کی امامت کیا کرتا تھا۔ جب وہ کوئی سورت شروع کرتا تو پہلے سورة اخلاص پڑھتا۔ جب اس سے فارغ ہوتا تو اس کے بعد دوسری سورت ملا کر پڑھتا۔ وہ ہر رکعت میں ایسا ہی کرتا تھا ۔ اس کے مقتدیوں نے اس پر اعتراض کیا کہ سورة اخلاص کو شروع فرما دیتے ہیں، پھر خیال کرتے کہ یہ سورت کافی نہیں اور دوسری سورت اس کے ساتھ ملاتے ہیں، ایسا کیوں کرتے ہیں ؟ یا صرف اسی کو پڑھا کریں یا پھر کوئی دوسری پڑھ لیا کریں۔ اس نے انھیں کہا : میں تو یہ سورت چھوڑنے والا نہیں، اگر تم راضی ہو تو میں تمہاری امامت کروں گا اور اگر تم ناپسند سمجھو تو میں امامت چھوڑنے پر تیار ہوں۔ لوگ اس کو اپنے میں سے سب سے افضل اور بہتر جانتے تھے، اس کے علاوہ کسی اور کی امامت کو اچھا نہیں سمجھتے تھے۔ جب رسول اللہ (صلی اللہ علیہ وآلہ وسلم) ان لوگوں کے پاس تشریف لائے تو انھوں نے یہ مسئلہ آپ (صلی اللہ علیہ وآلہ وسلم) کے سامنے پیش کیا تو آپ (صلی اللہ علیہ وآلہ وسلم) نے اس سے پوچھا : اے بندہ خدا ! تو ایسا کیوں نہیں کرتا جیسے تیرے ساتھی کہتے ہیں ؟ اور کس نے تجھے ہر رکعت میں اس سورت کو لازم کرنے پر ابھارا ہے ؟ وہ کہنے لگا : اے اللہ کے رسول ! مجھے اس سورت سے محبت ہے۔ آپ (صلی اللہ علیہ وآلہ وسلم) نے فرمایا : بیشک اس کی محبت تجھے جنت میں داخل کرے گی۔