(٢٧٠) عمرو بن یحییٰ مازنی اپنے والد سے نقل کرتے ہیں کہ ایک شخص نے عمرو بن یحییٰ کے دادا عبداللہ بن زید بن عاصم (رض) سے کہا : کیا آپ مجھے رسول اللہ (صلی اللہ علیہ وآلہ وسلم) کا وضو کر کے دکھا سکتے ہیں ؟ سیدنا عبداللہ بن زید (رض) نے فرمایا : جی ہاں ! پھر انھوں نے پانی منگوایا ، اپنے ہاتھوں پر ڈالا اور انھیں دو دو مرتبہ دھویا، پھر کلی کی اور تین مرتبہ ناک میں پانی چڑھایا، تین مرتبہ اپنے چہرے کو دھویا، پھر دو مرتبہ اپنے ہاتھوں کو کہنیوں سمیت دھویا، پھر اپنے دونوں ہاتھوں سے سر کا مسح کیا اور ہاتھ کو آگے سے پیچھے اور پیچھے سے آگے لے آئے، یعنی سر کے اگلے حصے سے شروع کیا اور گدی تک لے گئے، پھر ان دونوں کو واپس لوٹایا اور اپنی جگہ لے آئے جہاں سے شروع کیا تھا، پھر اپنے پاؤں کو دھویا۔