(٢٨٥٧) یزید بن حیان فرماتے ہیں کہ میں زید بن ارقم کے پاس گیا تو انھوں نے کہا کہ رسول اللہ (صلی اللہ علیہ وآلہ وسلم) ایک پانی کے پاس کھڑے ہوئے جس کو ” خما “ کہا جاتا ہے، یہ مکہ اور مدینہ کے درمیان ہے۔ آپ (صلی اللہ علیہ وآلہ وسلم) نے اللہ کی حمدوثنا بیان کی اور وعظ و نصیحت فرمائی پھر فرمایا : امابعد ! اے لوگو ! سنو میں بھی بشر ہوں، قریب ہے کہ میرے پاس فرشتہ آجائے تو میں اس کی بات سن لوں، یعنی میں اس دنیا سے چلا جاؤں، میں تم میں دو چیزیں چھوڑ کر جا رہا ہوں۔ ان میں سے پہلی اللہ کی کتاب ہے، اس میں رشد و ہدایت ہے۔ پس کتاب اللہ کو مضبوطی سے تھامے رہو اور اس پر عمل پیرا رہو، آپ (صلی اللہ علیہ وآلہ وسلم) نے اس پر عمل کے لیے ابھارا اور اس ترغیب دی ، پھر گویا ہوئے : اور میں اپنے اہل بیت کو تمہارے درمیان چھوڑ کر جا رہا ہوں، میں تمہیں اللہ کے لیے اپنے اہل بیت کے بارے میں نصیحت کرتا ہوں۔ حصین نے پوچھا : اے زید ! آپ (صلی اللہ علیہ وآلہ وسلم) کے اہل بیت کون تھے ؟ کیا ان میں آپ کی عورتیں بھی شامل تھیں ؟ انھوں نے کہا : جی ہاں ! آپ کی عورتیں بھی آپ کے اہل بیت میں شامل ہیں لیکن آپ کے اہل بیت وہ ہیں جن کے بارے آپ نے ذکر کیا ہے کہ ان پر صدقہ حلال نہیں، حصین نے کہا : وہ کون ہیں ؟ زید نے کہا : آل علی، آل عقیل، آل جعفر اور آل عباس، حصین نے کہا : کیا ان سب کے لیے صدقہ حلال نہیں ؟ زید نے کہا : نہیں۔