(٢٨٦١) (ا) سیدہ ام سلمہ فرماتی ہیں کہ یہ آیت میرے گھر میں نازل ہوئی ، یعنی { اِنَّمَا یُرِیْدُ اللّٰہُ لِیُذْھِبَ عَنْکُمُ الرِّجْسَ اَھْلَ الْبَیْتِ وَیُطَھِّرَکُمْ تَطْھِیْرًا } [الاحزاب : ٣٣] ” اللہ تعالیٰ چاہتا ہے کہ اے اہل بیت ! تم سے نجاست کو دور کر دے اور تمہیں بالکل پاک کر دے۔ “
سیدہ ام سلمہ (رض) فرماتی ہیں : رسول اللہ (صلی اللہ علیہ وآلہ وسلم) نے فاطمہ، علی، حسن اور حسین (رض) کو بلایا اور فرمایا : یہ میرے اہل بیت ہیں۔
(ب) قاضی اور سلمی کی حدیث میں ہے : ” ہولآء اہلی “ یہ میرے گھر والے ہیں۔ ام المومنین ام سلمہ (رض) فرماتی ہیں تو میں نے عرض کیا : اے اللہ کے رسول ! کیا میں اہل بیت میں شامل نہیں ہوں ؟ آپ نے فرمایا : کیوں نہیں تم بھی شامل ہو۔
(ج) امام بیہقی (رح) فرماتے ہیں کہ اس حدیث کے شواہد اور معارض بھی ہیں ان کی مثل ثابت نہیں۔ اللہ کی کتاب میں وضاحت موجود ہے جس کا ہم نے قصد کیا ہے، پھر نبی (صلی اللہ علیہ وآلہ وسلم) کے آل کو مطلق ذکر کرنے اور اس سے اپنی بیویاں مراد لینے سے معلوم ہوتا ہے کہ وہ بھی آل میں داخل ہیں۔