(٢٩٢١) نافع بن محمود انصاری عبادہ (رض) سے روایت کرتے ہیں کہ عبادہ (رض) ایلیا میں تھے، آپ صبح کی نماز میں پیچھے رہ گئے تو ابونعیم نے نماز کھڑی کردی۔ یہ وہ ہیں جنہوں نے سب سے پہلے بیت المقدس میں اذان کہی۔ میں سیدنا عبادہ (رض) کے ساتھ آیا۔ آپ لوگوں کے ساتھ آکر صف میں شامل ہوگئے۔ ابو نعیم اونچی آواز سے قراءت کر رہے تھے اور عبادہ (رض) سورة فاتحہ کی قرات (آہستہ) کر رہے تھے، مجھے سمجھ آرہی تھی۔ جب وہ نماز سے فارغ ہوئے تو میں نے عرض کیا کہ میں نے آپ کو سورة فاتحہ پڑھتے سنا ہے ؟ تو انھوں نے فرمایا : ہاں ! ہمیں رسول اللہ (صلی اللہ علیہ وآلہ وسلم) نے جہری نماز پڑھائی تو فرمایا : جب میں اونچی آواز سے قرات کررہا ہوں تو سورة فاتحہ کے علاوہ کچھ نہ پڑھا کرو۔