(٢٩٤) محمد بن عبداللہ بن ابی مریم فرماتے ہیں کہ میں سیدنا عثمان (رض) کے غلام ابن دارہ کے پاس ان کے گھر گیا تو انھوں نے مجھ سے فرمایا : کیا تو کلی کرے گا ؟ پھر فرمایا : اے محمد ! میں نے کہا : جی ! انھوں نے فرمایا : کیا میں تم کو رسول اللہ (صلی اللہ علیہ وآلہ وسلم) کا وضو نہ بتلاؤں ؟ میں نے کہا : کیوں نہیں ! انھوں نے فرمایا : میں نے سیدنا عثمان بن عفان (رض) کو بیٹھنے کی جگہ دیکھا، انھوں نے ایک برتن منگوایا، پھر تین مرتبہ کلی کی، تین مرتبہ ناک میں پانی چڑھایا اور تین مرتبہ اپنے چہرے اور بازوؤں کو دھویا اور تین مرتبہ سر کا مسح کیا، پھر اپنے قدموں کو دھویا۔ پھر فرمایا : جس شخص کو پسند ہو کہ وہ رسول اللہ (صلی اللہ علیہ وآلہ وسلم) کے وضو کا طریقہ دیکھے تو وہ میرے اس وضو کو دیکھ لے۔ ان کے علاوہ (دوسرے راویوں) نے پاؤں کو بھی تین مرتبہ دھونے کا ذکر کیا ہے۔