(٣٠٠) (الف) ربیع بنت معوذ بن عفرائ (رض) فرماتی ہیں کہ رسول اللہ (صلی اللہ علیہ وآلہ وسلم) ہمارے پاس آیا کرتے تھے۔ راوی کہتا ہے : ربیع (رض) نے حدیث بیان کی کہ رسول اللہ (صلی اللہ علیہ وآلہ وسلم) نے مجھ سے فرمایا : میرے لیے پانی ڈالو، میں نے آپ کے لیے ایک چھوٹے برتن میں پانی ڈالا تو آپ نے ایک مد اور ایک تہائی یا چوتھائی حصہ پانی لیا ، پھر فرمایا : میرے ہاتھ پر پانی ڈالو، پھر آپ نے اپنی ہتھیلیوں کو تین مرتبہ دھویا اور فرمایا : اس (برتن) کو رکھ دے۔ فرماتی ہیں : رسول اللہ (صلی اللہ علیہ وآلہ وسلم) نے وضو کیا اور میں دیکھ رہی تھی کہ آپ (صلی اللہ علیہ وآلہ وسلم) نے اپنے چہرے کو تین مرتبہ دھویا، کلی کی اور ایک مرتبہ ناک میں پانی چڑھایا اور اپنے دائیں اور بائیں ہاتھ کو تین مرتبہ دھویا، پھر اپنے سر کا دو مرتبہ مسح کیا، اپنے سر کے پچھلے حصے سے شروع کیا اور اگلے حصے تک لے آئے، پھر سر کے پچھلے حصے سے شروع کیا اور اگلے حصے تک لے آئے پھر اپنے کانوں کے ظاہری اور اندرونی حصوں کا مسح کیا اور اپنے دائیں اور بائیں پاؤں کو تین مرتبہ دھویا۔
(ب) ایک روایت میں ہے : پھر سر کے پچھلے حصے سے شروع کیا، پھر اگلے حصے پر کیا۔
(ج) سیدنا انس (رض) سے روایات ہے کہ آپ (صلی اللہ علیہ وآلہ وسلم) اپنے سر کا تین مرتبہ مسح کرتے تھے اور ہر مرتبہ نیا پانی لیتے تھے۔