(٣١٥٠) (ا) ابورافع بیان کرتے ہیں کہ میں نے حضرت عمر بن خطاب (رض) کے پیچھے نماز پڑھی تو انھوں نے رکوع کے بعد قنوت پڑھی اور اپنے ہاتھ اٹھا کر بلند آواز سے دعا کی۔
(ب) قتادہ بیان کرتے ہیں کہ حسن بصری (رح) بھی اس طرح کیا کرتے تھے۔
(ج) حضرت علی (رض) سے بھی یہی ہے مگر وہ سند ضعیف ہے اور قنوت وتر کے بارے میں سیدنا عبداللہ بن مسعود اور سیدنا ابوہریرہ (رض) سے بھی منقول ہے۔
(د) امام بیہقی (رح) فرماتے ہیں : دعا سے فارغ ہوتے وقت جو چہرے پر ہاتھ پھیرنے کا مسئلہ ہے یہ دعائے قنوت میں میں نے سلف سے کسی سے بھی یاد نہیں کیا۔ اگرچہ یہ بعض حضر ات سے نماز کے علاوہ دعا میں روایت بھی کیا گیا ہے۔ اس ضمن میں نبی (علیہ السلام) سے بھی ایک ضعیف حدیث منقول ہے اور یہ بعض لوگوں کا نماز سے باہر کا عمل بھی ہے۔ رہا نماز کے اندر منہ پر ہاتھ پھیرنا تو یہ عمل کسی صحیح حدیث سے ثابت ہے اور نہ کسی اثر اور قیاس سے زیادہ بہتر ہے یہ ہے کہ صرف اسی پر اکتفا کرلیا جائے جو سلف نے کیا ہے یعنی صرف دعا میں ہاتھ اٹھائے جائیں۔ وباللہ التوفیق