(٣٢٨٩) عبادہ بن ولید بن صامت روایت کرتے ہیں کہ ہم حضرت جابر بن عبداللہ (رض) کے پاس ان کی مسجد میں آئے۔ وہ ایک کپڑے کو لپیٹے نماز پڑھ رہے تھے۔ میں لوگوں کو پھلانگتا ہوا ان کے پاس جا پہنچا اور ان کے اور قبلے کے درمیان جا بیٹھا اور میں نے عرض کیا : اللہ تعالیٰ آپ پر رحم فرمائے ، کیا آپ ایک کپڑے میں نماز ادا کر رہے ہیں جب کہ آپ کا تہبند یہ رہا آپ کے پہلو میں ؟ تو انھوں نے فرمایا : میں چاہتا ہوں کہ میرے پاس تمہارے جیسے نادان آئیں تو وہ مجھے دیکھیں کہ میں کیسے کرتا ہوں اور وہ بھی اس طرح کریں۔۔۔
رسول اللہ (صلی اللہ علیہ وآلہ وسلم) (سفر جہاد میں) نماز کے لیے کھڑے ہوئے اور میرے اوپر ایک دھاری دار چادر تھی ۔ میں اس کے کنارے الٹنے لگا (تاکہ گردن سے باندھ لوں) ، لیکن وہ وہاں تک نہ پہنچ سکی ۔ میں نے اسے الٹ دیا۔ پھر میں نے اس کے کناروں کو مخالفت سمت کرلیا (یعنی داہنے کنارے کو بائیں طرف اور بائیں کنارے کو داہنی طرف) ۔ پھر میں نے اسے (گرنے سے بچانے کے لیے) جھک کر گردن سے روکے رکھا۔ پھر میں رسول اللہ (صلی اللہ علیہ وآلہ وسلم) کی بائیں جانب کھڑا ہوگیا ۔ آپ نے مجھے میرے ہاتھ سے پکڑ کر گھمایا اور اپنے داہنی طرف کھڑا کردیا۔
اتنے میں ابن صخر (رض) آگئے اور آپ کے بائیں جانب کھڑے ہوگئے۔ آپ (صلی اللہ علیہ وآلہ وسلم) نے ہم دونوں کو پکڑ کر اپنے پیچھے کھڑا کردیا۔ ہم آپ (صلی اللہ علیہ وآلہ وسلم) کے پیچھے کھڑے ہوئے۔ رسول اللہ (صلی اللہ علیہ وآلہ وسلم) مجھے مسلسل دیکھ رہے تھے ، لیکن میں سمجھ نہیں پا رہا تھا۔ پھر میں سمجھ گیا۔ آپ (صلی اللہ علیہ وآلہ وسلم) نے مجھے اشارہ کیا یعنی تہبند باندھ لو، جب رسول اللہ (صلی اللہ علیہ وآلہ وسلم) نماز سے فارغ ہوئے تو فرمایا : جابر ! میں نے عرض کیا : حاضر ہوں۔ اے اللہ کے رسول ! آپ (صلی اللہ علیہ وآلہ وسلم) نے فرمایا : جب کپڑا وسیع ہو تو دایاں کنارہ بائیں کندھے پر اور بایاں کنارہ داہنے کندھے پر ڈال لیا کرو اور اگر کپڑا چھوٹا ہو تو اسے کمر پر باندھ لو۔