(٣٥١٩) (ا) عقبہ بن عامر (رض) بیان کرتے ہیں کہ ہمارے ذمہ اونٹوں کو چرانا تھا۔ ایک دن میری باری آئی۔ میں شام کے وقت انھیں لے کر واپس آرہا تھا تو میں نے رسول اللہ (صلی اللہ علیہ وآلہ وسلم) کو لوگوں سے باتیں کرتے دیکھا، آپ (صلی اللہ علیہ وآلہ وسلم) فرما رہے تھے : جو مسلمان اچھی طرح وضو کرے پھر دو رکعتیں پڑھے، ان میں اپنے دل کو مکمل متوجہ رکھے تو اس پر جنت واجب ہوجاتی ہے۔ میں نے کہا : یہ کتنی اچھی بات ہے۔ اچانک ایک کہنے والے نے کہا کہ اس سے پہلے والی بات اس سے بھی بڑھ کر تھی۔ میں نے دیکھا تو وہ عمر بن خطاب (رض) تھے، کہنے لگے : میں نے تجھے دیکھا ہے کہ تم ابھی آئے ہو ۔ آپ (صلی اللہ علیہ وآلہ وسلم) نے فرمایا : تم میں سے کوئی بھی آدمی وضو کرے پھر پڑھے : أَشْہَدُ أَنْ لاَ إِلَہَ إِلاَّ اللَّہُ وَأَشْہَدُ أَنَّ مُحَمَّدًا عَبْدُاللَّہِ وَرَسُولُہُ تو اس کے لیے جنت کے آٹھوں دروازے کھول دیے جاتے ہیں جس سے چاہے داخل ہوجائے۔
(ب) کتاب الطہارۃ میں حضرت عثمان بن عفان (رض) کی روایت گزر چکی ہے جو وہ رسول اللہ (صلی اللہ علیہ وآلہ وسلم) سے وضو کے متعلق روایت کرتے ہیں کہ آپ (صلی اللہ علیہ وآلہ وسلم) نے فرمایا : جس نے میری طرح وضو کیا، پھر دو رکعت نماز ادا کی۔ ان میں اپنے نفس سے باتیں نہیں کیں تو اس کے سابقہ گناہ بخش دیے جائیں گے۔