(٣٥٢٧) عبداللہ بن عنمۃ (رح) بیان کرتے ہیں کہ سیدنا عمار بن یاسر (رض) مسجد میں تشریف لائے اور مختصر نماز پڑھی تو میں نے عرض کیا : اے ابویقظان ! آپ نے بہت مختصر نماز پڑھی ہے۔ انھوں نے فرمایا : کیا تم نے مجھے نماز میں کوئی کمی کرتے دیکھا ہے ؟ میرے جلدی کرنے کی وجہ یہ تھی کہ شیطان مجھے نماز میں بھلا نہ دے۔ میں نے رسول اللہ (صلی اللہ علیہ وآلہ وسلم) کو فرماتے ہوئے سنا ہے کہ آدمی نماز سے فارغ ہوتا ہے تو اس کے لیے نماز کا دسواں، نواں، آٹھواں، ساتواں، چھٹا، پانچواں، چوتھا، تیسرا اور کبھی آدھا اجر لکھا جاتا ہے۔
(ب) عبدالرحمن بن ہشام (رح) اپنے والد سے روایت کرتے ہیں کہ عمار بن یاسر (رض) نے دور رکعتیں پڑھیں تو عبدالرحمن بن حارث (رح) نے کہا : اے ابویقظان ! میرا خیال ہے کہ آپ نے نماز مختصر پڑھی ہے۔
(ج) ابویسر (رح) بیان کرتے ہیں کہ رسول اللہ (صلی اللہ علیہ وآلہ وسلم) نے فرمایا : تم میں سے کوئی مکمل نماز پڑھتا ہے اور کوئی نصف پڑھتا ہے، کوئی تیسرا حصہ، کوئی چوتھا حصہ اور کوئی پانچواں حصہ۔۔۔ حتیٰ کہ آپ نے دسویں حصے کا بھی ذکر فرمایا۔
(د) ابوہریرہ (رض) روایت کرتے ہیں کہ نبی (صلی اللہ علیہ وآلہ وسلم) نے فرمایا : بندہ نماز پڑھتا ہے اور اس کے لیے نماز کا دسواں، نواں، آٹھواں، ساتواں حصہ اور بعض کے لیے اس کی نماز کا مکمل اجر لکھا جاتا ہے۔