(٣٧٥٢) (ا) ایک دوسری سند سے بھی یہ حدیث منقول ہے مگر اس میں یہ الفاظ ہیں : اللَّہُمَّ اکْتُبْ لِی عِنْدَکَ بِہَا أَجْرًا، وَاجْعَلْہَا لِی عِنْدَکَ ذُخْرًا، وَضَعْ عَنِّی بِہَا وِزْرًا، وَاقْبَلْہَا مِنِّی کَمَا قَبِلْتَ مِنْ عَبْدِکَ دَاوُد۔” اے اللہ ! اس سجدے کے بدلے میں میرے لیے اپنے ہاں اجر لکھ دے اور اس کے ذریعے مجھ سے (گناہوں کا) بوجھ اتار دے اور اسے میرے لیے اپنے پاس ذخیرہ بنا لے اور اسے مجھ سے اس طرح قبول فرما جس طرح تو نے اپنے بندے حضرت داؤد (علیہ السلام) سے قبول کیا تھا۔ “ انھوں نے سورة صٓ کا ذکر نہیں کیا، بلکہ صرف اتنا کہا : میں نے دیکھا کہ میں نے سجدہ والی آیت پڑھی تو میں نے سجدہ کیا۔
(ب) اس کے آخر میں یہ اضافہ بھی ہے کہ حضرت محمد بن یزید بن خنیس (رح) بیان کرتے ہیں کہ حضرت حسن بن محمد بن عبیداللہ بن ابی یزید (رح) نے ہمیں رمضان المبارک کے مہینے میں مسجد حرام میں نماز پڑھائی۔ وہ سجدے والی آیت پڑھتے تو سجدہ کرتے تھے اور سجدے کو لمبا کرتے تھے۔ انھیں اس بارے میں کہا گیا تو انھوں نے فرمایا : مجھے حضرت ابن جریج (رح) نے فرمایا : مجھے تیرے دادا حضرت عبیداللہ بن ابی یزید (رح) نے اس بارے میں خبر دی۔