(٣٧٥٤) (ا) سیدنا ابوہریرہ (رض) سے روایت ہے کہ نبی (صلی اللہ علیہ وآلہ وسلم) نے سورة نجم میں سجدہ کیا اور آپ (صلی اللہ علیہ وآلہ وسلم) کے ساتھ دو آدمیوں کے علاوہ باقی سب لوگوں نے سجدہ کیا۔ وہ دونوں مشہور ہیں۔
(ب) امام شافعی (رح) بیان کرتے ہیں : وہ دو مرد فرض کو تو نہیں چھوڑ سکتے تھے ، اگر انھوں نے اس کو چھوڑ بھی دیا تھا تو رسول اللہ (صلی اللہ علیہ وآلہ وسلم) نے اس کے اعادہ کا حکم ضرور دیا ہوگا۔
اور رہی حضرت زید بن ثابت (رض) کی حدیث تو حضرت زید (رض) پڑھنے والے تھے۔ جب قاری نے سجدہ نہیں کیا تو رسول اللہ (صلی اللہ علیہ وآلہ وسلم) نے بھی نہیں کیا اور اگر فرض ہوتا تو رسول اللہ (صلی اللہ علیہ وآلہ وسلم) انھیں بھی سجدہ کرنے کا حکم دیتے۔
امام شافعی (رح) نے پانچ نمازوں کی فرضیت کے بارے میں نبی (صلی اللہ علیہ وآلہ وسلم) کی گزشتہ حدیث سے استدلال کیا ہے، جس میں ایک شخص نے پوچھا تھا کہ (ان پانچ نمازوں کے علاوہ) کوئی اور نماز بھی فرض ہے تو آپ (صلی اللہ علیہ وآلہ وسلم) نے فرمایا تھا : نہیں مگر یہ کہ تو نفلی عبادت کرے۔