(٣٧٧٨) (ا) ابوتمیمہ ہجیمی بیان کرتے ہیں : میں فجر کی نماز کے بعد وعظ و نصیحت کیا کرتا تھا اور آیت سجدہ کے وقت سجدہ کرتا تھا۔ ابن عمر (رض) نے مجھے تین بار منع کیا، لیکن میں نہ رکا تو انھوں نے فرمایا : میں نے رسول اللہ (صلی اللہ علیہ وآلہ وسلم) ، ابوبکر، عمر اور عثمان (رض) کے ساتھ نماز پڑھی ہے، انھوں نے سورج کے بلند ہونے تک کوئی سجدہ نہیں کیا۔
(ب) اگر یہ روایت مرفوع ثابت ہو تو سجدے کو مؤخر کرنا مستحب ہے، حتیٰ کہ مکروہ وقت ختم ہوجائے اور اگر یہ حدیث مرفوع ثابت نہ ہو تو گویا اس کو نفلی نماز پر قیاس کیا جائے گا اور عنقریب ہم ان شاء اللہ ” نہی مطلق “ پر دلیلیں پیش کریں گے کہ مطلق منع کرنے کا سبب کیا ہے۔
(ج) عطاء، سالم، قاسم اور عکرمہ (رض) سے منقول ہے کہ انھوں نے فجر اور عصر کے بعد سجدہ تلاوت میں رخصت دی ہے۔
(د) اور کعب بن مالک (رض) نے سجدہ شکر فجر کی نماز کے بعد کیا تھا جب انھوں نے توبہ کی بشارت سنی تھی اور یہ عمل رسول اللہ (صلی اللہ علیہ وآلہ وسلم) کے زمانے کا ہے۔