(٣٧٨٦) حضرت سیف (رح) بیان کرتے ہیں کہ میں نے حضرت مجاہد (رح) سے سنا کہ سیدنا ابن عمر (رض) کے گھر کوئی شخص آیا تو اس سے کہا گیا : یہ رسول اللہ (صلی اللہ علیہ وآلہ وسلم) کے ساتھ بیت اللہ میں داخل ہوئے تھے ؟ فرماتے ہیں : میں جب آیا تو رسول اللہ (صلی اللہ علیہ وآلہ وسلم) جا چکے تھے البتہ مجھے حضرت بلال (رض) دروازے کے پاس کھڑے مل گئے تو میں نے کہا کہ اے بلال ! کیا رسول اللہ (صلی اللہ علیہ وآلہ وسلم) نے کعبہ میں نماز پڑھی ہے ؟ انھوں نے فرمایا : ہاں پڑھی ہے۔ میں نے پوچھا : کہاں پڑھی ہے ؟ انھوں نے بتایا کہ دو ستونوں کے درمیان دو رکعتیں پڑھی ہیں، پھر نکل کر دو رکعتیں بیت اللہ کے سامنے پڑھی ہیں۔
(ب) حضرت ابونعیم (رح) سے منقول ہے کہ آپ نے کعبہ میں دو رکعتیں ادا کی ہیں۔ حضرت ایوب سختیانی، عبیداللہ بن عمر، فلیح بن سلیمان، ابن عون (رض) کی روایتیں جو انھوں نے حضرت عبداللہ بن عمر (رض) سے نقل کی ہیں تمام اس پر متفق ہیں کہ حضرت ابن عمر (رض) یہ پوچھنا بھول گئے کہ آپ (صلی اللہ علیہ وآلہ وسلم) نے کتنی رکعتیں نماز ادا کیں ؟ اس حدیث میں تعداد کی تعیین ہو رہی ہے کہ آپ نے دو رکعتیں ادا کی ہیں۔
(ج) یہ احتمال ہوسکتا ہے کہ انھوں نے آپ (صلی اللہ علیہ وآلہ وسلم) کی نماز کی کم سے کم مقدار بیان کی ہو اور دو رکعتوں سے زیادہ جو آپ نے ادا کی ہیں ان پر سکوت اختیار کیا ہو؛ کیونکہ انھوں نے حضرت بلال (رض) سے نہیں پوچھا تھا۔