(٣٨٤٦) (ا) عامر (رح) بیان کرتے ہیں کہ میں نے نعمان بن بشیر (رض) کے پیچھے نماز پڑھی، وہ دو رکعتیں پڑھ کر سیدھے کھڑے ہوگئے۔ لوگوں نے سبحان اللہ کہا تو وہ بیٹھ گئے، پھر جب نماز سے فارغ ہونے لگے تو انھوں نے سہو کے دو سجدے کیے اور ہم نے بھی ان کے ساتھ سجدے کیے۔
(ب) ہمارے نزدیک یہ ہے کہ وہ سیدھے کھڑے نہیں ہوئے ہوں گے۔ ہمیں یحییٰ بن سعید (رح) سے سیدنا انس بن مالک (رض) کے واسطہ سے روایت بیان کی گئی ہے کہ حضرت انس بن مالک (رض) عصر کی نماز میں دو رکعتوں کے بعد کھڑے ہونے لگے تھے تو لوگ سبحان اللہ کہنے لگ گئے تو وہ بیٹھ گئے ، پھر (آخر میں) انھوں نے بیٹھے بیٹھے سہو کے دو سجدے کیے۔