(٣٩٥٤) (ا) ابوہریرہ (رض) فرماتے ہیں کہ رسول اللہ (صلی اللہ علیہ وآلہ وسلم) ابی بن کعب (رض) کے پاس سے گزرے، وہ کھڑے نماز پڑھ رہے تھے۔ آپ نے انھیں بلایا : اے ابی ! ادھر آؤ تو ابی نے جلدی جلدی نماز پڑھی، پھر رسول اللہ (صلی اللہ علیہ وآلہ وسلم) کے پاس آئے تو آپ نے فرمایا : اے ابی ! تمہیں کیا چیز مانع تھی جب میں نے تمہیں بلایا تم آئے نہیں ؟ کیا تم نے اللہ کا یہ قول نہیں سنا { یَا أَیُّہَا الَّذِینَ آمَنُوا اسْتَجِیبُوا لِلَّہِ وَلِلرَّسُولِ إِذَا دَعَاکُمْ } [الانفال : ٢٤] اے ایمان والو ! اللہ کی بات مانو اور رسول اللہ (صلی اللہ علیہ وآلہ وسلم) کی بات پر لبیک کہو جب بھی وہ بلائیں تو ابی نے کہا : اے اللہ کے رسول ! میں نے غلطی کی ہے، آپ جب بھی مجھے بلائیں میں آپ کی پکار پر لبیک کہوں گا، اگرچہ میں نماز ہی کیوں نہ پڑھ رہا ہوں۔ آپ نے فرمایا : کیا تو پسند کرتا ہے کہ میں تجھے ایک ایسی سورت سکھاؤں جو اللہ نے نہ انجیل میں نازل کی اور نہ توراۃ میں نہ زبور میں ہے اور نہ اس کی مثل بقیہ قرآن میں ہے ؟ ابی نے کہا : اے اللہ کے رسول ! ضرور بتائیے ! آپ نے فرمایا : اس سورت کو سیکھنے سے پہلے مسجد سے نہ نکلنا اور نبی (صلی اللہ علیہ وآلہ وسلم) چلتے چلتے مسجد سے نکلنے لگے، جب نکلنے کے لیے دروازے تک پہنچے تو ابی نے کہا : سورت اے اللہ کے رسول ! تو رسول اللہ (صلی اللہ علیہ وآلہ وسلم) رک گئے ، پھر فرمایا : اچھا ہاں ! تو اپنی نماز میں کیا قرات کرتا ہے ؟ ابی نے ام القرآن کی تلاوت کی تو رسول اللہ (صلی اللہ علیہ وآلہ وسلم) نے فرمایا : اس ذات کی قسم جس کے قبضے میں میری جان ہے اس جیسی سورت نہ توراۃ میں اتاری گئی نہ انجیل میں نازل ہوئی نہ زبور میں اور نہ ہی قرآن میں اس کی مثل کوئی سورت ہے اور یہ ہی سبع مثانی ہے جو اللہ نے مجھے عطا کی ہے۔
(ب) ایک دوسری سند سے ابی بن کعب (رض) سے اس کے معنیٰ میں روایت منقول ہے، وہ سورت فاتحہ کے قصہ میں ہے، دورانِ نماز جواب دینے کا قصہ اس کے علاوہ ہے۔