(٣٩٨٥) (ا) عبداللہ بن حنظلہ بن راہب (رح) بیان کرتے ہیں کہ حضرت عمر بن خطاب (رض) نے ہمیں مغرب کی نماز پڑھائی تو اس کی پہلی رکعت میں قرات نہ کی۔ جب دوسری رکعت کے لیے کھڑے ہوئے تو سورة فاتحہ اور ایک سورت پڑھی۔ پھر دوبارہ سورة فاتحہ اور کوئی اور سورت پڑھی۔ جب نماز سے فارغ ہوئے تو سلام پھیرنے کے بعد دو سجدے کیے۔
(ب) عاصم بن علی (رض) کی روایت میں ہے : پھر وہ اسی طرح چلتے رہے (نماز جاری رکھی) جب نماز پڑھ لی تو سہو کے دو سجدے کیے پھر سلام پھیرا۔
(ج) حارث (رض) کی روایت میں حضرت علی (رض) سے منقول ہے کہ ایک شخص نے کہا : میں نے نماز پڑھی ہے مگر اس میں قرات نہیں کی۔ انھوں نے پوچھا : کیا تو نے رکوع و سجود کو پورا کیا ہے ؟ اس نے کہا : جی ہاں ! حضرت علی (رض) نے فرمایا : تیری نماز مکمل ہوگئی۔
(د) یہ حدیث اگر صحیح ہو تو اس کو جہری قرات کے ترک کرنے یا فاتحہ کے علاوہ کسی اور سورت کی قرات کے ترک کرنے پر محمول کیا جائے گا، اس کی دلیل وہ گزشتہ احادیث ہیں جو قرات کے وجوب کے بارے میں گزشتہ صفحات میں گزر چکی ہیں۔