(٣٩٩٩) اسامہ بن زید (رض) کے آزاد کردہ غلام حرملہ بیان کرتے ہیں کہ ایک دفعہ وہ عبداللہ بن عمر (رض) کے ساتھ بیٹھے ہوئے تھے کہ حجاج بن ایمن بن ام ایمن داخل ہوا، جو انصار کا ایک شخص تھا اور ایمن اسامہ بن زید (رض) کا بڑا بھائی تھا۔ حرملہ بیان کرتے ہیں : حجاج نے ایسی نماز پڑھی جس میں اس نے رکوع و سجود کو مکمل نہیں کیا، جب اس نے سلام پھیرا تو ابن عمر (رض) نے اسے بلا کر کہا : اے بھتیجے ! تو کیا سمجھتا ہے کہ تو نے نماز پڑھ لی ہے ؟ تیری نماز نہیں ہوئی۔ اپنی نماز لوٹا ۔ جب حجاج چلا گیا تو عبداللہ بن عمر (رض) نے مجھے کہا : یہ کون تھا ؟ میں نے کہا : حجاج بن ایمن بن ام ایمن۔ ابن عمر (رض) بولے : اگر رسول اللہ (صلی اللہ علیہ وآلہ وسلم) اس کو دیکھ لیتے تو اس سے محبت کرتے، پھر انھوں نے محبت کی وجہ ذکر کی کہ ام ایمن نے اسے جنا تھا اور ام ایمن نبی (علیہ السلام) کی پرورش ونگہداشت کرنے والی تھیں۔