(٤١٧١) عبداللہ بن شہاب خولانی فرماتے ہیں کہ میں حضرت عائشہ (رض) کے پاس مہمان تھا، میں جنبی ہوگیا تو اپنے کپڑوں کو پانی میں ڈبو دیا۔ حضرت عائشہ (رض) کی لونڈی نے مجھے دیکھ کر آپ (رض) کو خبر دے دی۔ حضرت عائشہ (رض) نے اس کو میری طرف بھیجا۔ پھر فرمایا : تجھے اپنے کپڑوں کے ساتھ ایسا کرنے پر کس چیز نے ابھارا ؟ میں نے کہا : میں نے وہ کچھ دیکھا جو سونے والا دیکھتا ہے۔ حضرت عائشہ (رض) نے پوچھا : کیا آپ نے کچھ اثر دیکھا ہے ؟ میں نے کہا : نہیں۔ انھوں نے فرمایا : اگر تو نے کچھ دیکھا ہوتا تو اسے دھو دیتا۔ مجھے یاد ہے کہ میں نبی (صلی اللہ علیہ وآلہ وسلم) کے کپڑوں سے خشک منی کو اپنے ناخنوں سے کھرچ دیا کرتی تھی۔