(٤٢٠١) عبداللہ بن عمر (رض) فرماتے ہیں کہ عمر بن خطاب (رض) نے مسجد کے دروازے پر ایک دھاری دار قمیص دیکھا تو کہنے لگے : اے اللہ کے رسول ! اگر آپ اسے خرید لیں تاکہ جمعہ کے دن پہنیں اور وفدوں سے ملاقات کریں۔ آپ (صلی اللہ علیہ وآلہ وسلم) نے فرمایا : یہ وہ پہنتے ہیں جن کے لیے آخرت میں کچھ بھی حصہ نہیں ہے۔ پھر نبی (صلی اللہ علیہ وآلہ وسلم) کے پاس کچھ قمیصیں آئیں، آپ (صلی اللہ علیہ وآلہ وسلم) نے حضرت عمر (رض) کو ان میں سے ایک عطا کی۔ حضرت عمر (رض) کہنے لگے : اے اللہ کے رسول ! آپ مجھے وہ چیز پہنا رہے ہیں جس کے بارے میں آپ (صلی اللہ علیہ وآلہ وسلم) نے یہ یہ فرمایا تھا، نبی (صلی اللہ علیہ وآلہ وسلم) نے فرمایا : میں نے یہ آپ کو پہننے کے لیے نہیں دی تو حضرت عمر (رض) نے مکہ میں رہنے والے اپنے مشرک بھائی کو پہنا دی۔