(٤٣٩٣) ابن عباس سے منقول ہے کہ عبداللہ بن عباس، عبدالرحمن بن ازھر اور مسور بن مخرمہ نے ابن عباس کے آزاد کردہ غلام کریب کو نبی (صلی اللہ علیہ وآلہ وسلم) کی بیوی حضرت عائشہ (رض) کی طرف بھیجا اور کہا : ہمارا سلام کہنا اور عصر کے بعد دو رکعتوں کے بارے میں سوال کرنا کیونکہ ہمیں پتہ چلا ہے کہ آپ پڑھتی ہیں حالانکہ نبی (صلی اللہ علیہ وآلہ وسلم) نے اس سے منع کیا تھا۔ ابن عباس (رض) فرماتے کہ میں اور حضرت عمر (رض) اس وجہ سے لوگوں کو مارتے تھے۔ کریب کہتے ہیں : میں نے پوچھا تو انھوں نے مجھے ام سلمہ کی طرف روانہ کردیا۔ میں واپس ان کے پاس آیا اور کہا : انھوں نے تو ام سلمہ کی طرف روانہ کردیا ہے۔ وہ مجھ سے کہنے لگے : ام سلمہ (رض) کی طرف جاؤ۔ جب میں ام سلمہ (رض) کے پاس آیا اور پوچھا تو وہ فرمانے لگی : آپ (صلی اللہ علیہ وآلہ وسلم) اس سے منع کرتے تھے لیکن میں نے آپ (صلی اللہ علیہ وآلہ وسلم) کو عصر کے بعد پڑھتے بھی دیکھا ہے۔ میرے پاس اس وقت بنی حرام کی عورتیں موجود تھیں، میں نے ایک بچی کو آپ (صلی اللہ علیہ وآلہ وسلم) کی طرف بھیجا کہ آپ (صلی اللہ علیہ وآلہ وسلم) کے پہلو میں کھڑی ہوجانا اور آپ (صلی اللہ علیہ وآلہ وسلم) سے کہنا کہ ام سلمہ (رض) فرماتی ہیں : اے اللہ کے رسول ! آپ تو ان دو رکعتوں سے منع فرماتے ہیں اور خود پڑھ رہے ہیں، اگر آپ (صلی اللہ علیہ وآلہ وسلم) اپنے ہاتھ سے اشارہ کردیں تو پیچھے ہٹ جانا۔ ام سلمہ (رض) فرماتی ہیں کہ بچی نے ایسے ہی کیا، جب نبی (صلی اللہ علیہ وآلہ وسلم) نے اپنے ہاتھ سے اشارہ کیا تو وہ پیچھے ہٹ گئی۔ جب آپ (صلی اللہ علیہ وآلہ وسلم) نماز سے فارغ ہوئے تو فرمانے لگے : اے ابو امیہ کی بیٹی ! تو نے عصر کے بعد والی دو رکعتوں کے بارے میں پوچھا ہے، میرے پاس عبدالقیس قبیلہ کے لوگ آئے تھے جو مسلمان ہوئے تو ان کی وجہ سے میں ظہر کے بعد والی دو رکعتیں نہ پڑھ سکا، یہ وہ ہیں۔