(٤٨١٠) زرارہ بن ابی اوفی سعد بن ہشام سے نقل فرماتے ہیں کہ انھوں نے اپنی بیوی کو طلاق دی، پھر مدینہ کی طرف کوچ کیا تاکہ اپنے گھر کا سامان بیچ ڈالیں اور اس سے اسلحہ خرید کر روم کے جہاد میں شامل ہوجائیں اور اپنی شہادت تک جہاد کرتے رہیں۔ کہتے ہیں : میرے قوم کے لوگوں کا ایک گروہ مجھے ملا انھوں نے بیان کیا کہ نبی (صلی اللہ علیہ وآلہ وسلم) کے دور میں چھ آدمیوں نے اس بات کا ارادہ کیا تھا، لیکن نبی (صلی اللہ علیہ وآلہ وسلم) نے فرمایا : یہ طریقہ اچھا نہیں۔ آپ (صلی اللہ علیہ وآلہ وسلم) نے ان کو منع کردیا اور ان کو واپس کردیا۔ پھر وہ ہماری طرف لوٹے اور انھوں نے بتایا کہ وہ ابن عباس (رض) کے پاس آئے اور وتر کے بارے میں سوال کیا تو انھوں نے کہا : کیا میں تجھے اس کے بارے میں نہ بتاؤں جو تمام لوگوں سے زیادہ نبی (صلی اللہ علیہ وآلہ وسلم) کے وتر کو جانتا ہے ! میں نے کہا : ہاں، ابن عباس (رض) فرمانے لگے : عائشہ (رض) کے پاس جاؤ اور نبی (صلی اللہ علیہ وآلہ وسلم) کے وتر کے بارے میں سوال کرو۔ واپس آ کر مجھے بھی بتانا جو وہ جواب دیں۔ سعد بن ہشام فرماتے ہیں : میں حکیم بن افلح کے پاس آیا اور میں نے ان کو ساتھ لیا۔ فرماتے ہیں : میں ان کے قریب نہیں جاؤں گا، میں نے ان کو منع کیا تھا کہ وہ ان دو بیعتوں کے بارے میں کچھ نہ کہیں، مگر انھوں نے کہا : میں نے قسم کھالی ہے۔ سعد بن ہشام کہتے ہیں کہ میرے ساتھ حکیم بن افلح آئے اور ہم عائشہ (رض) کے پاس آئے تو عائشہ کہنے لگیں : حکیم ! عائشہ (رض) نے اس کو پہچان لیا تو انھوں نے کہا : ہاں۔ عائشہ (رض) نے پوچھا : تیرے ساتھ کون ہے ؟ انھوں نے کہا : سعد بن ہشام۔ فرماتی ہیں : عامر کا بیٹا اس پر رحم کھایا اور فرمایا : عامر اچھا آدمی ہے۔ میں نے کہا : اے ام المومنین ! مجھے نبی (صلی اللہ علیہ وآلہ وسلم) کے اخلاق کے بارے میں بتاؤ۔ فرماتی ہیں : کیا آپ نے قرآن نہیں پڑھا ؟ میں نے کہا : کیوں نہیں ! فرماتی ہیں کہ نبی (صلی اللہ علیہ وآلہ وسلم) کا اخلاق قرآن ہی ہے۔ سعد بن ہشام کہتے ہیں : میں نے اٹھنے کا ارادہ کیا تو حکیم بن افلح نے میرے لیے نبی (صلی اللہ علیہ وآلہ وسلم) کے قیام کی بات شروع کردی تو عائشہ (رض) نے فرمایا : کیا تو نے یہ سورت نہیں پڑھی :{ یایھا المزمل } میں نے کہا : کیوں نہیں ! فرماتی ہیں کہ اس سورت کی ابتدا میں اللہ نے رات کے قیام کو فرض کیا تو رسول اللہ (صلی اللہ علیہ وآلہ وسلم) اور آپ (صلی اللہ علیہ وآلہ وسلم) کے صحابہ نے ایک سال تک رات کا قیام کیا یہاں تک کہ ان کے پاؤں سوج گئے اور اس کے اختتام پر اللہ نے بارہ مہینے مقرر کیے ہیں۔ پھر اللہ نے اس سورت کے آخر میں تخفیف نازل کردی تو فرض ہونے کے بعد رات کا قیام نفل بنادیا گیا۔ سعد بن ہشام کہتے ہیں : میں نے پھر اٹھنے کا ارادہ کیا تو حکیم نے پھر میرے لیے نبی (صلی اللہ علیہ وآلہ وسلم) کے وتر کی بات شروع کردی۔ میں نے کہا : اے ام المؤمنین ! مجھے نبی (صلی اللہ علیہ وآلہ وسلم) کے وتر کے بارے میں بتاؤ۔ فرماتی ہیں کہ ہم آپ (صلی اللہ علیہ وآلہ وسلم) کے لیے مسواک اور وضو کا پانی تیار کردیتے پھر جتنا وقت اللہ چاہے نبی (صلی اللہ علیہ وآلہ وسلم) کو بیدار کردیتے۔ آپ (صلی اللہ علیہ وآلہ وسلم) مسواک اور وضو فرماتے، پھر آٹھ رکعات نماز ادا کرتے، صرف آخری رکعت میں تشہد کرتے۔ پھر آپ (صلی اللہ علیہ وآلہ وسلم) بیٹھ جاتے، اللہ کا ذکر کرتے، دعا اور استغفار کرتے، کھڑے ہوتے لیکن سلام نہیں پھیرتے تھے۔ بعد میں سلام پھیرتے، پھر نویں رکعت پڑھتے تو بیٹھ جاتے، اللہ کی حمد بیان کرتے، اس کا ذکر کرتے، دعا کرتے، پھر آپ (صلی اللہ علیہ وآلہ وسلم) سلام پھیرتے جو ہمیں سنوا دیا کرتے تھے۔ سلام پھیرنے کے بعد دو رکعات بیٹھ کر نماز پڑھتے تو یہ گیارہ رکعات ہوتی تھیں۔ جب آپ (صلی اللہ علیہ وآلہ وسلم) کی عمر بڑی ہوگئی اور جسم بھاری ہوگیا تو آپ (صلی اللہ علیہ وآلہ وسلم) نے سات وتر پڑھے تو سلام پھیرنے کے بعد بیٹھ کر دو رکعات ادا کیں۔ اے بیٹے یہ نو رکعات تھیں اور نبی (صلی اللہ علیہ وآلہ وسلم) جب کوئی نماز پڑھتے تھے تو اس پر ہمیشگی کو پسند فرماتے تھے۔ اور جب آپ (صلی اللہ علیہ وآلہ وسلم) کو رات کے قیام سے نیند، تکلیف مرض اور مشغول کردیتے تو آپ (صلی اللہ علیہ وآلہ وسلم) دن کو ١٢ رکعات ادا کرلیتے اور مجھے معلوم نہیں کہ نبی (صلی اللہ علیہ وآلہ وسلم) نے ایک رات میں مکمل قرآن پڑھا ہو یا مکمل رات قیام کیا ہو اور رمضان کے علاوہ مکمل مہینہ کے روزے رکھے ہوں۔ میں ابن عباس (رض) کے پاس آیا اور ان کو حدیث سنائی تو وہ فرمانے لگے : عائشہ (رض) نے سچ فرمایا ہے۔ اگر میں ان کے پاس جاتا تو آمنے سامنے بات کرلیتا۔